Libya tuilian avangin mi 2000 chuang thi

Mediterranean tuipuia thlipui leh ruah Daniel thawk avangin Africa khawmualpuia Libya khawchhak lam chuan tuilian nasa tak an tuar a, tuilian avanga thi zat hi mi 2,000 chuang an tling tawh.

Dam pahnih chhiat vangin Derna khawpui chuan tuilian hi an tuar nasa ber a ni. Tuilian hian lei leh kawngpui te a tihchhiat avangin Derna khua hi kalpawh theih a la ni lo. An khaw mi pakhatin social media-a video pakhat a post aṭanga a lan danin, Derna kawtthler lai tak paltlanga luang, Wadi Derna lui chuan a kam vela chenna in zawng zawng chu a chim vek a ni. Eng leh inbiakpawhna engmah an nei lo bawk.

Red Cross official Tamer Ramadan chuan tuilen hnuah mi 10,000 vel chu an chin hriat lohin an awm mek tih a sawi. Red Crescent thupuangtu Tawfiq al-Shukri chuan thi hriatchian tawh hi mi 2,084 an ni tawh a, in leh lo chan mi 20,000 an awm niin a sawi.

Libya khawchhak lam prime minister Ossama Hamad chuan Derna chu disaster zone-ah puang nghalin, Thawhṭanni aṭang khan ni 3 chhung chhiatna tawkte sunna hun hman a nih tur thu a puang bawk. Sunna hun hman chhung hian flag zawng zawng a ngul chanvea tar tur a ni ang.

Libya-ah hian mihring vbc 6 chuang an cheng a, ram buai reng ṭhin an nih avangin building sak ṭha tawk lo a tam hle. Tuialhtheia hausa tak ram mah ni se rorelna inchuhin khawchhak leh khawthlang lamah rorelna hran awmin an inṭhen a, a khawi lam pawh hian sipai pawl, ram dang sorkar leh hel pawl thlawptu an nei ve ve a ni.