Red Cross-in North Korea-ah Volunteer 43,000 chuang tir

International humanitarian organization, Red Cross chuan nimin khan volunteer mi 43,000 chuang North Korea-ah a tir lut a, heng volunteer-te hi Covid-19 dona kawnga pui tur leh tuilian tuarte chhawmdawlna hna thawk tura kal an ni. 

July 26 khan North Korea-ah hian Covid-19 hri kai pakhat hmuhchhuah a ni. NKorea hotupa Kim Jong Un kaihhruai sorkar chuan meeting an nei nghal a, South Korea aṭanga dan loa lut nia puh hri kai hmuhchhuah luhna ramria khua Kaesong-ah chuan lockdown puan nghal a ni a, ram pumah emergency puan a ni nghal bawk. 

Kar liam ta Nilaini khan North Korea-a rorellai, Workers' Party of Korea (WPK) chuan meeting an nei a, he meeting-ah hian an rama hri kai chungchang sawi lan niin, hmalak dan turte rel a ni. NKorea hi inkharkhip tlat ram a nih avang hian an ram chhungah hian hri hi a darh tawh em tih tuman an hre chiang lo. 

International Federation of Red Cross and Red Crescent Societies (IFRC) thupuangtu Antony Balmain chuan NKorea-a volunteer-te tirh a nih chhan chu Covid-19 hri laka an him theihna tura ṭanpui tumna  leh tuilian an tawrh mek laka an puihna tur a nih thu a sawi. 

NKorea-ah hian ruah tui tlak tam avangin hmun ṭhenkhatah tui a lian a, tuilian hian thlai a tihchhiat bakah ram chhunga ei leh in mamawh supply-na kawngah harsatna a siam phah a ni. Thla hmasa khan IFRC chuan hri leng dona atana NKorea tan hian coronavirus test kit 10,000 a thawn lut tawh a, hei bakah hian thermometer, surgical mask, gown leh protective gear-te pawh an thawn tel a ni.