Hong Kong-ah chanchinbu mi Rinhlelh thilah an man

Hong Kong-a chanchinbu mi hausa, Jimmy Lai chu ramdang sipaite a thawhpui nia puh avangin nimin khan national security law thar hnuaiah man a ni. 

Kum 71 mi Lai hi chanchinbumi a nih bakah Hong Kong-a democracy activist lar tak a ni a, anni huna nimin zing dar 7:00 vel khan police officer 10-in a chenna inluah chhuahin an man ta a ni. A chanchinbu Apple Daily headquarters pawh police-te hian an dap nia sawi a ni bawk. 

Hong Kong police-te chuan an ramah mi pasarih kum 39 aṭanga 72 miin national security law an bawhchhiat thu an puang a, heng zingah hian Lai pawh hi a tel a ni. He dan hnuaia Article 29-ah mahni emaw midang/thil dang hmanga ramdang aṭanga thlawpna neite chu damchhung lungin tan tir theih an nih thu police-te chuan an tarlang bawk. Dan loa kum 2019–20 chhunga Hong Kong-a nawrh huaihawt a nih khan Lai hi a tel nia sawi a nih avangin kumin February 20 khan man a lo ni tawh bawk.

Sawisel hlawh tak national security law hi kumin June 30 khan hman theih tura pawm a ni a, British aṭanga China kuta Hong Kong hlan chhawn a nih dawna China leh British sorkarin inremna an ziah hun, July 1, 1997 denchhenin kumin July 1 aṭang khan he national security law thar hi Hong Kong-ah hman ṭan a lo ni ta a ni. 

He dan hnuaiah hian sorkar laka inlakhran duhna, sorkar beih tumna, sorkar laka a hel zawnga chetna leh ram dang sipai emaw pawl emaw thawhpui tumna kawnga chete chu thiam loh chantir theih an ni. An thil tihsual a nasat dan azirin kum 10 aṭangin dam chhung hial te pawh lungin tantir theih a ni. Hei vang hian US, British leh ramdangten he law hi nasa takin an sawisel.

Democratic party politician Emily Lau chuan mipui ten zalenna an neih loh thu sawiin, ram hmasawnna atan thil ṭha lo tak a nih thu a sawi. Committee to Protect Journalist-a Asia program coordinator Steve Butler chuan Lai an man chungchangah hian sorkar lam sawisel zawnga chanchinthar ziah chu khap a nih thu leh chanchinbu mite rahbehna nia a lan thu a sawi.