Kim leh Putin-te'n meeting nei

Russia tlawha zin, North Korea ram hotu Kim Jong-un leh Russia president Vladimir Putin-te chuan nimin khan Russia khawchhak lam, Amur bial-a Vostochny Cosmodrome-ah meeting an nei.

Ram pahnih hruai­tute'n meeting an neih hma lawk hian North Korea chuan an ram khawchhak lam tuipui kam aṭangin short-range ballistic misisle a kap chhuak.

Russia spaceport, Vostochny Cosmo­drome-a an inhmuh hian Kim Jong-un chuan an ram tlawh tura a sawm avangin Russia President Putin chu lawmthu a hrilh a, Putin pawhin an inhmu thei chu lawmawm a tih thu a sawi ve bawk. Meeting-ah hian Putin chuan satellite siamna kawngah NKorea chu Russia-in a puih tur thu a hrilh. Ralthuam inleitir chungchang pawh an sawi dun a, inremna an siam ngei rin a ni a, mahse, report lamah erawh hemi chungchang hi an tarlang tel lo thung.

Kim chuan kawng hrang hrangah President Putin hmalakna chu a thlawp zel dawn tih hrilhin, a bikin ram dangte chunga inluling a, an ram zauh tuma hma la tute beih letna kawngah an thawk dun zel dawn tih a sawi bawk. Meeting neih hmaa chanchinthar lakhawmtute a kawmnaah, Kim chuan Russia nena inzawmna siam chu a ngaih pawimawh ber a nih thu a lo sawi tawh a ni.

Nimina meeting an neihnaah hian kumin July thlaa North Korea tlawhtu, Russia defence minister Sergei Shoigu pawh a tel a, Kim hi military official, Korean People's Army marshal Pak Jong Chon leh Munitions Industry Department director Jo Chun Ryong-te'n an ṭawiawm bawk.

North Korea-in nimina an ram hotu zin chhuah laia missile pahnih an kah chhuah hi Japan exclusive economic zone (EEZ) pawn lam tuipuiah a tla niin Japan chief cabinet secretary Hirokazu Matsuno chuan a sawi. Kum 2017-a UN-in nuclear missile programme kalpui khapna resolution a siam chungin NKorea hian missile hi a enchhin ngun hle. Nikum kumtir aṭang khan ṭum 100 chuang missile hi a kap chhuak tawh nia sawi a ni.