Imran Khan leh a fapate phone-a an inbiak phalsak

Official Secrets Act Special Court chuan jail-a tang mek,an ram prime minister hlui Imran Khan chu September 15 thleng phone hmangin a fapate a biak a phalsak.

Pakistan Tehreek-e-Insaf (PTI) hotu Khan hian hun rei tak chu a lawyer-te bakah a fapate biak phalsak turin a lo ngen tawh a ni.

Imran Khan-a lawyer, Sheeraz Ahmed Ranjha chuan court hian jail official-te hnenah PTI hotu chu telephone hmanga a fapate biak phalsak turin a lo hriattir tawh a, mahse, jail official-te hian phalna hi an pe duh lo niin a sawi. Hei bakah police-te chuan a lawyer-te'n a tanna, Attock Jail-a hmuh an tum pawh an phalsak lo tih a sawi bawk.

Judge Abul Hasnat Zulqarnai chuan jail thuneitute'n court thupek an zawm lo nia sawi chungchangah, Attock jail superintendent Arif Shehzad chu hriattirna pein, thil awm dan report turin a ti.

Imran Khan hi prime minister a nih laia ram hruaitu a nih anga thilpek a dawnte a mimal tana kawl leh hralha puhna, Toshakhana case-ah thiam loh chantir a nih hnuin Attock Jail-ah hian tantir a ni. Islamabad Court chuan thiam loh chantir a nihna hi suspend-in, bail-a chhuah turin a ti a, mahse, special court chuan a thubuai dang, sorkar thuruk tiputchhuaka puhna, cypher case-ah a hreng zui ve leh a ni.