US-ah hri kai mtd nga tling tawh

Khawvela Covid-19 kai leh he hri vanga thi tamna ber ram, US-ah chaun hri kai hi maktaduai nga an chuang tawh. Hripui vanga thi hi mi 1,62,455 an tling tawh bawk a ni. 

US-a state 20 dawnah chuan hri kai leh hri vanga thi hi an la pung zel. Hetih lai hian July thla aiin hri kai punna hi a tlahniam zawk nia sawi a ni thung. Khawvel pumah coronavirus kai maktaduai 19.6 an awm tawh a, mi 7,27,000 in an thihpui tawh bawk. US dawtah Brazil chu hri kai tamna niin, mi maktaduai thum chaungin an kai tawh a, nuai khat chuangin an thihpui tawh bawk. India chu hri kai tamna ram pathumna niin, maktaduai 2.15 in Covid-19 an kai tawh. Russia leh South Africa ramte chu hri kai tam zualna ramah an tel bawk. 

New Zealand-ah chuan ni 100 chung ram chhung mi hri kai hmuh an awm tawh lo a, nunphung pawh a pangngai chho tawh a ni. Director-General of Health Dr Ashley Bloomfield chuan ni 100 chhung tualchhung mi hri kai hmuh an awm tawh loh chu thil chhinchhiah tlak tak a nih thu a sawi a, hemirual hian inthlahdah mai a la chi loh thu a sawi. Ram dangah pawh boruak a ṭha tawh nia ngaih hnua hri rawn leng ṭha leh a awm fo tih sawiin, hetiang hi a thlen lohna tura an inbuahsaih reng a ṭul thu a sawi bawk. 

Hetih lai hian thuneitute chuan mipuite zingah test neih duh lo an awm leh, sorkarin contact tracing app a siam hmang duh lo te, hygiene rules siamte ngaihthah an awmte chu ṭha lo an tih thu an sawi. 

Europe ram zingah hri leng tuar hmasa, Spain ramah hun rei tak inkharkhipna khauh taka kalpui a nih hnuin,  hri leng hi a ziaawm tak avangin khuahkhirhna siamte pawh an thlahdul. Sumdawnna hmunte pawh hawn niin, hna pawh thawh chhunzawm a ni tawh bawk. 

Mahse tun hnaiah hri kai hmuh chhuah an pung thar leh hle. Kar liam ta chhung khan hri kai hmuh chhuah thar hi mi 20,680 an awm leh. An zinga 139 chu damdawiina dah luh niin mi pathumin an thihpui leh a ni. Hri kai an pun chhoh leh avangin sorkar pawh hri leng dona kawnga a hma lak dante ennawn turin an ngen. Thuneitute pawhin social distancing dan hman ṭhat theih lohna hmun, a bikin public transport-ahte face mask vuah ṭha turin mipuite an ngen nghal a ni. 

Hri kai an pun thar leh avangin Denmark pawhin an mi leh sate chu ṭul bik thilah loh chuan Spain rama zin lo turin a chah. 

United Nations hnuaia UN-Water group chuan tunlaia khaw­vela hripui leng mek, Covid-19 laka invenna pawimawh chu kut sil fai leh sil ngun a nih laiin, khawvela mi tluklehdingawn thum velin inah tui herh haw tur leh sahbawn an nei lo a ni, a ti.

Mi maktaduai thum velin inah tui herh haw tur an nei lo a, mi maktaduai li velin tui van avangin kum khatah thla khat tal harsatna an tawk a ni, tiin UN group chuan a tarlang.  Tui hnianghnar hman tur nei lo mi tam tak an awm avangin, hripui leng mek pawh hi a darh chak phah a ni tiin a tarlang.