Suu Kyi-i damdawi lam enkawlna pe duh loah sipaite puh

Myanmar ram hruaitu paihthlak tak, Aung San Suu Kyi-i chu a tanna jail-ah damdawi lam enkawlna leh ei tur ṭha te pe duh loah a party, National League for Democracy (NLD) chuan sipai sorkar an puh.

Kum 2021, February 1-a sipaite'n civil sorkar thuneihna an hnehchhuh hnuah Suu Kyi hi an hreng nghal a, a hnuah jail-ah an dah lut a ni. Tualchhung media-te chuan kum 78 mi, Suu Kyi hi a hriselna a ṭha tawk lo a, luhai te neiin, a luak fo a, a ha na avangin thil pawh a ei ṭha thei lo niin tun hnaiah an tarlang.

NLD chuan an hruaitu hi a hriselna dinhmun a ṭha lo chungin damdawi lam enkawlna ṭha pek a ni lo a, hei bakah a taksa chakna turin ei tur ṭha leh hrisel an pe tam tawk lo tih an sawi. Thuchhuah an siamah, Suu Kyi-i hriselna dinhmun hi ṭha lo zel a, a nunna dinhmun derthawnga a awm a nih chuan, sipai sorkar chu a mawhphurtu a nih tur thu an sawi.

Suu Kyi-i fapa naupang zawk, Kim Aris chuan a nu hriselna dinhmun chu a ngaihtuah hle tih sawiin, a dinhmun chiang taka hriat theihna tura biakpawh theih dan awm se a duh takzet tih a sawi. Mahse sipai sorkar hian Suu Kyi-i hi midang a biakpawh a phalsak lo a, a ukil-te nen pawh hmaichhanah an inhmu thei lo a ni. Kim Aris chuan, "A mimal doctor hmuh an phalsak lo a, tlawhtu a neih pawh an phal lo. Tang dangte nena intlawhpawh an phal bawk silo a, khung hran tlat a ni," tiin a rilru lam thlenga a nghawng a hlauthawnawm niin a sawi.

Suu Kyi-i party, NLD hi kumin March thla khan sipaiin electoral law thar khirhkhan tak a siam hnuaia a in register nawn leh avangin sipai sorkar chuan a lo ṭhiahsak tawh a, kum 2025-a inthlan an neih turah pawh he party hminga chuh theih loh turin a paihsak a ni.