Putin-a'n North Korea tlawh tura sawmna pawm

Russia president Vladimir Putin chuan an ram tlawhtu, North Korea hotu Kim Jong-un-a'n zin ve tura a sawmna chu a pawm.

Putin leh Kim-te hi Nilaini khan Russia khawchhak lam, Vostochny Cosmodrome space centre-ah meeting neiin, darkar li chuang an inkawm a ni. He hunah hian Kim chuan an ram tlawh turin Putin hi a sawm a, Putin pawhin Russia-NKorea inlaichinna tihngheh leh hmasawnpui zelna turin a sawmna hi lawm takin a lo pawmsak tih NKorea state news agency, KCNA chuan a sawi.

Meeting an neih zawha chanchinthar lakhawmtute'n an kawmnaah, President Putin chuan ram pahnihte inzawmna leh inṭhianṭhatna nghet tak mai chu fakin, an sipaite thawhho theihna tur kawng pawh a awm dawn tih a sawi. Kim pawhin Russia chuan a hmelmate lakah hnehna ropui tak a chang ngei dawn niin tih a sawi ve bawk. Meeting-ah hian US leh khawthlang ramte'n an lo helh lawk tak, ralthuam supply leh weapon programme chungchang an sawi dun em tih chu ram pahnihte chuan an sawi lang lo a ni.

Kim hi meeting zawh hnuah pawh Russia-ah hian la cham chhunzawmin, hmun dang a tlawh leh nghal a, mahse, a kalna tak erawh puanzar a ni lo.