Saudi Arabia-in mi 47 a tihlum

Saudia Arabia sorkar chuan firfiaka chetnaa inhnamhnawiha puh mi 47 te chu kar kalta Inrinni khan a tihlum a, an zingah hian Shiite sakhaw hotu, kum 2011-a nawrh huaihawtnaa a hotu zinga mi, Sheikh al-Nimr pawh a tel.

Tihhlum zinga Nimr tel vang hian Shiite minority te an lungawi lo hle a, tharum thawhna pawh a thlen phah a ni. Saudia Arabia ah hian Shiite Muslim hi an tlem zawk a, an ram khawchhak lamah an awm deuh ber a ni.

Saudi Arabia sorkar hnuaia Saudi Press Agency chuan mi tihhum 47 te hming hi a tichhuak a, state television pawhin a puang bawk. Mi 47 tihhlum zingah hian mi 45 chu Saudi khua leh tui an i a, Chad mi pakhat leh Egypt mi pakhat an tel bawk a ni. Tihhlum zingah hian al-Qaida preacher, al-Zahani pawh a tel a, ani hi Saudi Arabia rama 'most wanted terrorist' zinga mi a ni. Inrinni khan an ram khawpui, Riyadh leh khawpui dang 12 ah mi 47 te hi tihhlum an ni.

Amnesty International chuan Saudi Arabia sorkar thiltih hi a dem thu a sawi a, a bikin Shiite hotu tihhlum a ni chu Saudi thuneituten anmahni dodaltute nuaibo an tumna kawng pakhat nia a ngaih thu a tarlang.

Al-Nimr hi kum 2012 khan man a nia, hemi hma hian mipuite chuan roreltu, midangte tihhlum hreh lo leh nawrh huaihawtte chunga dik lo taka rorel ṭhinte an duh loh thu a aupui a ni. A thubuai ngaihtuah a nih lai hian Al-Saud chhungkaw rorelna a pawm leh pawm lohte zawh a ni bawk. Nimr hian an puhna te a phat loh thu a sawi rualin, ralthuam a chelek ngai loh thu leh, mipuite pawh tharum thawh zawnga che tura a fuih ngai loh thu a sawi.

Kum 2015 khan Saudi Arabia sorkar hian thiam loh a chantir, mi 157 a tihlum a, kum sawmhnih chhunga mi a tihhlum tam ber
ṭum a ni. “Interior ministry chuan Inrinni-a mi 47 tihhlumte hi kum 2003-2006 inkara an rama pawikhawihna thleng hrang hranga inhnamhnawihte an nih thu a sawi. Kum 2003 May thla khan Riyadh Compund bomb a ni a, mi 30 chuang an thi a ni.

Kum 2004 khan pawikhawih-na ṭum 30 zet a thleng bawk a, hemi hnu hian sorkar chuan al-Qaida firfiak pawl leh an rama helho lakah beihpui a thlak a ni.