Tel Aviv-a pawikhawihtu zawng mek

Israel security force-te chuan Tel Aviv khaw-puia pub-a mi pahnih kaphlum a, mi dang pasarih hliamtu chu man tumin ngawrh takin an zawng mek.

Kum thar ni, January 1 khan Tel Aviv-a Dizeng-off kawtthlera pub-ah pawikhawihna hi a thleng a, hemi hma hian Palestinian mite chuan Israel mite an beih fo bakah, Islamic State (IS) firfiak pawl chuan Israel vauna hi a lo tichhuak bawk.

Tel Aviv pub-a pawi-khawihna a thlen hnu hian police tam tham takin a chhehvel bialah pub beitu hi an zawng a, helicopter hmanga an vil reng bakah, in hrang hrangahte an lutkual a ni.

Media report chuan pawikhawihtu hi Arab mi, Israel hmarlam aṭanga kal, tunhnaia sipai a beih avanga jail-a pawh lo tang tawh niin an sawi a, mahse police lam chuan a sawichiang duh lo thung. Police thupuangtu, Micky Rosenfeld chuan he pawikhawihna thleng hi misual thiltih nge, firfiakte an inrawlh tih an chhui mek thu a sawi.

Israel Prime Minister Benjamin Netanyahu chuan Inrinni khan pawikhawihna thlenna hmun hi a tlawh a, Israel Arab-te chenna bialah venhimna khauh zawka kalpui a nih tur thu a sawi a, Negev, Galilee leh Triangle-ahte police station dah belh bakah, police officer pawh tam zawk lak belh tum a ni. Netanyahu chuan pub-a pawikhawihna thleng chu tualthahna tenawm tak a ni tiin, Israel Arab hruaituten he pawikhawihna an dem thu an sawichhuak chu lawmawm a tih thu sawi bawk.

Kum 2015 chhung khan Palestinian-te pawikhawihnaah Israel mi 21 an thi a, an zinga a tam zawk hi chu chema vih leh silaia kahte an ni. Palestinian leh Israel mite inkara buaina chhuakah Palestinian mi 131 an thi bawk a ni.