Al-Shabab in member thar zawnnaah Donald Trump video an hmang

Somalia rama Al-Qaida firfiak pawl zawmpui, Al-Shabab chuan an pawl zawm tura sawmna an siamah US presidential candidate, Donald Trump-a video clip an tilang tel.

Al-Shabab hian US chu mi hangte enhrang leh, Muslim-te tihlum ṭhin ram niin a sawi. Video a tichhuah hi minute 51 awh a ni a, kar kalta Zirtawpni khan an tichhuak a ni. Vidoa-ah hian Donald Trump-an a campaign-naa a thusawi, US himna tura an rama Muslim mi reng reng luh khap rawtna a siam laite an tilang tel a ni.

Presidential candidate dang, Hillary Clinton chuan firfiak pawl dang, Islamic State (IS) pawhin an zawm turte an zawnna Trump-a thusawi hi an lo hmang tel tawh niin a sawi a, mahse Trump chuan hei hi thu dik lo a nih thu a sawi thung.

Al-Shabab te hian Somalia rama khawelin a thlawp sorkar chu an bei reng a, mahse kum 2011 khan African Union sipaite puihnain an ram khawpui, Mogadishu aṭangin helho hi umchhuah an ni. Mahse hemi hnu pawh hian Somalia ram bakah Kenya, Djibouti leh Uganda-ahte pawikhawihna an thlen chhunzawm reng a ni.