Libya ram tuiliana thi mi 11,000 an tling tawh

Libya ram khawchhak lama tuilian nasa tak thleng vanga thi chu mi 11,000 an tling tawh a, chin hriat lohin mi 10,000 vel an awm mek bawk.

Dam pahnih chim vangin tuipui kama khawpui, Derna chuan tuilian nasa tak a tuar a, in tam tak len chhiain kawtthlerte tuiin a chim nasa hle.

United Nations official-te chuan meteorological service mumal tak awm ni se, tuilian vanga hetiang taka chhiatna leh thihna thleng chu eng emaw chen pumpelh theih a nih a rinawm thu an sawi. World Meteorological Organisation hotu, Petteri Taalas chuan, "Emergency management thuneitute chuan mipuite chu hmun him lamah an lo sawnchhuak hmasa hman thei tur a ni," a ti. WMO hian tuilian thlen hma darkar 72-ah sorkar chu email leh media hmangin warning an lo pe lawk vek tih an sawi.

Libya khawchhak lam bial official-te chuan thlipui leh ruahpui thawk tur hi mipute hrilhin, tuipui kama chengte chu insawnchhuak turin thurawn an pe a, mahse dam chu chhe mai thei a nih thu erawh warning an tichhuak tel lo thung.

Easter Libya-a health minister Othman Abduljaleel chuan chhiatna thlenga thi tam tak chu a ruala phum an ni tih a sawi. Ningani khan ruang 3,000 phum an ni a, a tam zawk chu Dernia khaw daiah phum an ni tih an sawi.

Tuilianin chhiatna a thlen avanga thi zat hi an la pun chhoh a rinawm a, in chim hnuaiah ruang hmuh belh an la awm zel a ni. Derna mayor Abdel-Moneim al-Ghaithi chuan an dinhmun thlirin, thi zat hi 20,000 pawh a tlin theih mai a rinawm thu a sawi a ni.