Pakistan Court-in Imran Khan bail dilna a hnawlsak

Pakistan court chuan an ram prime minister hlui, Imran Khan-a'n state thuruk tiputrua puh a nihna thubuaia bail a dilna chu a hnawlsak.

Pakistan Tehreek-e-Insaf (PTI) hotu, Imran Khan hi official secret document, Cipher tia an sawi tiputrua puh a ni. Nikuma rally a neihnaah a kaihhruai sorkar paihthlaknaah US a inrawlh tih sawiin, a finfiahna a neih thu a sawinaah confidential letter hi a keng lang a ni. He case-ah hian Khan bakah, PTI vice president, foreign minister hlui Shah Mahmood Qureshi pawh thubuai siamsak a ni bawk.

Judge Abul Hasnat Muahmmad Zulqarnai chuan Official Secrets Act hnuaiah Khan-a bail dilna hi a hnawlsak a, sorkar prosecutor ngenna angin Khan dilna a ngaihtuah dawn hian journalist leh lawyer, he case nena inkaihhnawihna nei lote chu court room aṭangin a chhuahtir vek a ni.

Thawhṭanni khan court chuan Cipher case-a Khan an hrenna chu September 26 thleng atan a lo pawtsei tawh bawk.

Kum 70 mi, cricketer-turned-politician hi Pakistan prime minister a nihna aṭangin co-confidence vote hmangin paihthlak a ni a, he thilah hian Pakistan sipai leh US chu inrawlhah a puh a, mahse anni erawh chuan a puhna hi an pha thung. PM aṭanga paihthlak a nih hnuah hnuah Khan hi thubuai 150 chuang siamsak a ni tawh a, heng zingah hian court thupek zawm lo leh, firfiak zawnga che, pawikhawihna thlen zawng mipuite fuiha puhnate pawh a tel.

Eiruk thubuaiah thiam loh chantir ni tawhin kum thum tang tura hrem a ni a, Punjab province khawchhak lama tan-in, venhimna khauh tak hnuaiah tantir mek a ni.