Saudi Arabia-in Iran palaite a hnawtchhuak

Saudi arabia chuan Iran nena an inpalaitawnna a tihtawp thu sawiin, an rama Iran palai awmte chu darkar 48 chhunga an ram chhuahsan turin a hriattir.

Kar kalta Inrinni-a Saudi Arabia-in firfiaka inhnamhnawiha puha mi 47 a tihhlum zingah Shia Muslim hotu pakhat a tel a, hei hi Iran chuan nasa takin a sawisel a, hei vang hian Saudi chuan ram pahnihte inzawmna hi titawp a tum ta a ni. Iran-a palai a dahte pawh a ko kir nghal bawk.

Saudi Foreign Minister Adel al-Juberi chuan Pathianni khan Iran nena inpalaitawnna chu an tihtawp thu a puang. Hei hi Iran chuan chhang letin, he thil avang hian Saudi-in sakhaw hotu a tihhlum chungchanga a thil tihsual lian tak chu a khuhbo phah dawn lo, a ti.

Hetihlai hian US chuan ram pahnihte chu inbengdai tura ngenin, an inkara inhriatthiam lohna awmte chingfel tur chuan palai intirh tawn chu thil pawimawh tak a nih thu a sawi. US state department thupuangtu, John Kirby chuan ram pahnih hruaitute chu boruak siamṭha tura theihtawpa an nawr chhunzawm zel tur thu a sawi.

Inrinni-a mi 47-te tihhlum an nih hnuah Pathianni tlai khan Saudi police pakhat chu kahhlum a ni a, security force-te chuan pawikhawihtu hi an zawn mek thu leh, he thil thleng hi firfiaka chetna a nih thu an sawi. Police thupuangtu chuan Iran chuan Saudi security tihderthawn a tum tih sawiin, firfiak pawl a din bakah ralthuamte a pe ṭhin a ni, a ti.

Iran chanchin chu a chhe lam hawi vek a nih thu leh, a inrawlhnaah pawh chhiatna in a zui zel thu a sawi bawk. Iran hotu lu ber, Supreme Leader Ayatollah Ali Khameinei chuan Saudi Arabi-in Shia hotu a tihhlum, Sheik Nimr chu martar dik tak a ni a ti a, tihhlum a nih avang hian Middle East-a Shia muslim-te chuan phuba an la la ngei dawn a ni, a ti.

Sheik Nimr tihhlum a nih hnu hian Terhan-a Saudi embassy-a mipui thinrim eng emaw zat an pungkhawm a, building an hal zui bawk. Mahse he thil thlengah embassy-a thawk zingah hliam tuar an awm lo niin Saudi foreign ministry chuan a sawi. Saudi Arabi leh Iran inkar hi hun rei tak chhung chu a ṭha lo tawh a, Iran nuclear program chungchangah te, kum 1987 leh 2015-a Hajj biakzina kal zingah Iran mite thih danah pawh an lo buai tawh a ni.
Lebanon-a Shia Hezbollah movement hotu, Hassan Nasrallah pawhin Saudi sorkar thiltih dan chu na taka sawiselin, Shia leh Sunni te inkara indo chawh chhuah tumah a puh. Sheikh Nimr-a thisen chuan Saudi chhungkua chungah an thih hma zawng hri ṭha lo a thlen dawn a ni, a ti.