IS-in Britain vauna video tichhuak

Islamic State (IS) firfiak pawl chuan Britain ram vauna video a tichhuak thar. IS hian video hi Pathianni khan internet-ah dahin, hetah hian Iraq leh Syria-a an pawl laka beihpui thlaktu, ṭangrual ram tana enthlak hna thawktua an puh, mi panga an tihhlum lai an tilang tel a ni.

Video-ah hian IS fighter zinga pakhat chuan Britain Prime Minister David Cameron chu IS-te a cho chungchangah a chhang let a, Cameron chu mi mawl tak a ni tiin, mi mawl tak chauhin Allah lalna ram lakah indo an puang ngam a ni, a ti.

Cameron-a kaihhruaina hnuaia an pawl beitute chu inngaihtuah nawn tura hrilhin, man leh harsatna dang an tawhah sorkar chuan a ngaihtuah tak tak dawn lo niin a sawi. Britain hian ṭangrual ramten IS lakah beihpui an thlaknaah a tel a, Iraq rama beihpuia thlak hnuah nikum December thla aṭang khan Syria rama firfiakte hmun hi a bei ve leh ṭan a ni.

Enthlatu-a puha an tihhlum mi panga-te inpuan-na pawh tilang tel mah se, khawi ram mi nge tih leh, tu tana thawk nge an ni tih chiang taka sawifiah a ni lo. Mahse an zinga pakhat chuan Iraq leh Syria rama IS laka beihpui thlak mek, US kaihhruai ṭangrual pawl chungchang a sawilang a ni.

IS chuan indona thiang-hlim an puan chu chhunzawm zel an tum thu te, an ram lakahte chuan Islam dan, Sharia hmanga ro an rel tur thute an sawi. Hetihlai hian mithiamte chuan IS-te hian indonaa an dinhmun a ṭhat loh deuhin video hi tihchhuah hi an ching niin an sawi thung. Iraq chuan Pathianni kalta khan IS-ten kum 2015, May thlaa security force-te kut aṭanga an lak, Ramadi khawpui chu an la let leh tawh niin a tarlang.