UN-in Iran-a Saudi embassy beih a dem

United Nations Security Council chuan Saudi Arabia-in Shia sakhaw hotu a tihhlum avanga Iran mipui thinrimin an ram khawpui, Tehran-a Saudi embassy an bei chu a dem thu a sawi.

UNSC hian Tehran-a Saudi embassy leh Mashhadd-a Saudi consultate beih a demna thu a chhuahah hian, Shia cleric tihhlum tak, Nimr al-Nimr chungchang erawh a sawilang tello.

Nimr tihhlum a nih avanga Iran mipui thinrimin Saudi embassy bei a, an halsak avang hian Saudi sorkar chuan Iran nena an inpalaitawnna pawh a titawp nghal a, Iran-a a palaite chu ko hawin, an rama Iran palai awmte chu chhuak turin a hriattir nghal a ni. Iran nena an inkara air traffic link pawh a titawp vek a, Saudi mite chu Iran rama an zin khap an ni bawk.

UNSC chuan Iran thuneitute chu ram palaite leh an hmunhmate chu venhim sak turin a ti a, ram pahnihte an inkar boruak siamṭha tura inbiakna nei turin a nawr nghal bawk.

UN-a Saudi palai, Abadallah al-Mouallimim chuan Iran-in ramdangte ramchhung inrelbawlnaa inrawlha chin ṭhin a sim chauhin ram pahnihte chuan an inkar boruak chu an siamṭha thei dawn a ni, a ti.

Saudi embassy beih a ni chu Bahrain, UAE leh Sudan ram pawhin an dem thu an sawi a, Bahrain chuan Iran-a an embassy chu an khar thu leh, an rama Iran palai awmte pawh chhuak tura an hriattir thu a sawi. Sudan pawhin Saudi a thlawpna lantirna atan Iran nena an inpalaitawnna chu a titawp nghal tih a puang bawk a ni. UAE pawin Iran rama a ambassador dah chu ko hawin, embassy pawh officer-in-charge kutah a dah.

Hetihlai hian Middle East-ah chuan Shia Muslim-te chuan Nimr tihhlum a nih avanga lungawi lohna an la lantir chunzawm zel.