Nepal sorkarin Madhesi hotu pathum a man

Nepal sorkar chuan Madhes ram zalenna tura beitu mi pathumte chu ram phatsantua puhin hrenhranna hmunah an dah. Anni pathum hian mipui punkhawm huaihawtin Madhes ram zalenna turin an fuihpawrh niin an puh.

Nepal chhim lam ram phaizawl chu Madhesi mite ram bil emaw zalenna pumhlum neia mahni kea ding turin heng mi pathumte hian an bei a ni. Heng Madhesi hotu pathumte hi Nepal chhim lam Siraha district aṭangin an man a, Kathmandu-ah hruaiin Special court-ah hruai nghal an ni.

Mi pathum an hrente hi Chandeshwor Mahato (kum 60), international observer anga thawk leh Sudip Raj Kushwaha (kum 26), mipui pungkhawma election officer leh Bishnu Dev Chaudhary (kum 35) Madhes zalenna tura beitute an ni. Nepal chhimlam ram hi ram danpui siam thar a nih khan a nghawng ber tur a nih vangin an buai hle.