Obama-a'n US ah silai hralh dan khuahkhirh tum

Thawhlehni khan US President Barack Obama chuan kumin sorkar kum tawp hma ngeia silai hralh chhuah dan khuahkhirh a tum thu a puang. US rorelkhawl Congress chuan silai khuahkhirh burna dan an pass theih loh hnuah Obama hian president anih anga thuneihna (presidential powers) chu a hmang dawn ta a ni.

Kum thum kaltaa Newtown khuaa Sandy Hook Elementary School naupang 20 rual silai kengin a thah aṭang khan US ah hian silai khuahkhirh duh an tam hle a. Hetih lai hian silai ngainatu leh khuahkhirh ṭul tilo pawl an awm ve bawk.

National Rifle Association, khuahkhirh ṭul tilo pawl lian ber chuan Obama ruahmanna hi na takin an sawisel nghal thung. Ruahman dan chuan silai hralhchhuah kawnga thil felhlel awmthei chhuiin, silai zuartu chu sorkara inziaklut a ni ngei em tih endik ṭhin a ni ang.

Kum tinin US ah hian silai dawr aṭang niloin silai maktaduai tel hralhchhuah a ni ṭhin. Ruahmanna tharah chuan FBI 230 velin sorkara inziak lut loten silai an hralh chhuak em tih an endik ṭhin ang.

Kum sawm kalta chhung khan US ah silai hmang tharum thawhnaah mi 1,00,000 chuang in nunna an chan. Bureau of Alco≠hol, Tobacco, Firearms and Explosives (ATF) chuan tu pawhin silai a zuar duh a nih chuan sorkar
aṭanga phalna a nei ngei tur a ni a,an hralhchhuah dan pawh endik ni zel rawh se tiin rawtna a siam a ni.