H-bomb test vangin UN-in Nkorea hrem dawn

UN Security Council chuan tun hnaia NKorea-in Hydrogen bomb a enchhin vangin khuah≠khirhna dan siam thuai a nih tur thu an sawi.

UN Security Council chuan H-bomb enchhin chu an dem thu tarlangin, khawvel himna tiderthawng thei leh muanna ti
ṭhuanawp thei a ni an ti.

US chuan bomb enchhinna in a nghawng chu a zau em tih zirchiang turin hma an la nghal a; US White House thupuangtu Josh Earnest chuan 'hlawhtling takin h-bomb hi an enchhin ngei em tih hriatchianna a la awm lo' niin a sawi.

"Darkar 24 kalta chhunga thil thleng khan US in NKorea sipai chakna leh ralthuam a neih dan a hriat ṭhin chu a tidanglam chuang lo ang" tih Josh Earnest chuan a sawi.

Hetih lai hian US president inthlana chuh tumte leh Congress member-te chuan NKorea chu na zawka hrek an duh thu an sawi. Tun dinhmunah NKorea hi khawvel ram hrang hrangten sum leh pai leh kawng hrang hrangah an hrek mek hlawm a ni. NKorea
ṭhian leh a ram ṭhenawm China ram pawh hian nasa zawka hrek chu a thlawp an ring hlawm.

Chinese foreign ministry thupuangtu Hua Chunying chuan NKorea chu nuclear ralthuam nei lo tura a intiamna zah tur leh helai bial dinhmun ti chiai zawnga hma la lo turin kan phut tlat a ni a ti. Beijing chuan Nkorea ram palai chu koh a tum thu leh ram inpalai tawnna zawnah H-bomb enchhin chu an dodal tih hrilh an tum niin a sawi.