Donald Trump-a'n UK vau

US president inchuhna kal mekah Republican lama hminglar tak Donald Trump chuan, UK in an rama luh an phalsak lo a nih chuan Scotland rama dollar mtd 700 hu investment a kalpui mek chu a hnukkir ang tih a sawi.

British MP te chuan January 18 hian US president ni thut thei khawpa dinhmun ṭha chang mek, Trump hi Britain ram chhunga a chetvel phalsak tur a ni em tih an rel dawn. Hetiang boruak a awm lai hian, Trump chuan UK ram chhunga luh leh chhuah an phal lo a nih chuan Scotland-a golf chawikanna tur investment a kalpui chu hnutletah a vau ta a ni.

Donald Trump chungchang UK in an buaipuina chhan ber chu, US ram chhunga Muslim mite luh phalloh nise tia a sawi nghawng zel a ni. Donald Trump thusawi duh lo hian UK mipui maktaduai telin hming an ziak hial a ni.

Trump Organisation chuan Scotland rama South Ayrshire leh Aberdeen-ah golf hmunpui dollar mtd 700 man hu siam tharna tura ruahmanna thar chu Trump laka UK in khuahkhirhna a siam chuan hnuhkir vekah a vau a ni.

"Trump laka khuahkhirhna an kalpui a nih chuan khawvel mithmuhah UK hian freedom of speech a dodal angin an hmu vek dawn a, investment ti duh pawh an hnar zel tihna ani dawn niin Trump organisation chuan an sawi. US khua leh tui, Trump-a thlawptu mi tam tak a tibeidawng dawn a, chinfel ngai tam tak a awm ngei tih an tarlang.

Donald Trump hian nikum December thla khan firfiakte beihna a hmachhawn loh nan muslim te luh theih hauh loh turin US chhuahka hi khar vek ni rawh se tiin a sawi a. He hi Muslim nupa Syed Rizwan Farook leh Tashfeen Malik ten California-a San Bernardino damdawi in an luhchilh vanga mi 14 zetin nunna an chan vanga a sawi a ni. UK mipui 5,60,000 chuan Donald Trump hi a thusawi vangin UK-ah luh phal nilo rawh se tiin petition an theh lut a, hei hi House of Common petition committee chuan pawmin, January 18 ah Westminster Hall-ah an sawiho dawn a ni.

Trump thusawi hi American tam zawkin an thlawp a, US-a state 30 chuangin Syrian raltlante dan an nih theih nan theihtawp chhuah an tum tih an sawi nghal a ni. President Obama chuan US ah Syria mi raltlan 15,000 zet lakluh a tum vanga he thu hi irhchhuak zel a ni.

January 18-a UK rorel khawlin Trump-a an ram chhunga luh phalsak tur ani em tih an sawiho turah hian vote lak a ni dawn loa, sawiho tawpah Home secretary Theresa May chuan thutlukna a siam ang.