B'desh-in Islamist hruaitu tihhlum turin rel

Bangladesh chuan nilaini khan Pakistan laka zalenna an sual laia (kum 1971) Islamist party hruaitu pakhat chu indo kaihhnawih thubuai vangin tihhlum turin a chungthu a rel. Bangladesh Supreme court chuan Jamaat-e-Islami party hruaitu Motiur Rahman Nizami-in ngenna a thlen chu hnawlin, Rahman hi tihhlum turin thutlukna a siam ta zawk a ni. Rahman hian tualthah, pawngsual leh ram hruai≠tu lawk te leh mithiam rual thah an nih theih nana phiarrukna thubuai a awrh a ni.

Kum 72 a upa Rahman hi kum 2001-06 chhung khan Bangladesh sorkarah minister a ni. Kum 2013 december hnu lamah hian Jamaat-e-Islami party hruaitu hlun deuh deuh pathumte chu indo kaihhnawih thubuai vangin tihhlum an ni tawh. Indo kaihhnawiha thubuai neite chungthu an rel dan hi khawvel ram tam takin an pawm lo thung.

Sorkar ukil chuan Rahman hi Pakistan laka zalenna sual anih lai khan Jamaat-a zirlai pawl hruaitu niin, Pakis≠tan thlawptu hel pawl a awn a. Buai lai kha remchangah hmangin professor, thuziaktu, doctor leh journalist te an that niin a sawi. Heng thah tak te hi Rahman-a ruahman leh thlanchhuah vek an ni a, mi 500 chuang thah an ni tih Ukil chuan a sawi.

Rahman-a ukil Khand≠ker Mahbub Hossain chuan Rahman biak rawn leh hunah hmalak dan tur an rel ṭha dawn niin a sawi. Kum 2010-a Prime Minister Sheikh Hasina in ro a rel hnu
aṭang khan eptu hruaitu 10 chuang zet thi turin an chungthu rel a ni tawh a ni. Human right pawlte chuan court rorelna chu khawvel mithmuhah rorelna dik tawklo a ni tih an sawi thung.