Korea hotuin Russia bomber leh missile-te enfiah; Russia-in thilpek atan drone leh bulletproot vest a pe

Russia ram tlawha zin, North Korea ram hotu Kim Jong-un chuan Inrinni khan Russia bomber, hypersonic missile leh warship-te a enfiah a, Russia defence minister Sergei Shoigu-a'n a ṭawiawm. Nimin khan an ram lamah kirin, Russia chuan thilpek atan explosive drone panga, reconnaissance drone leh bulletproof vest a pe.

Kim hi Inrinni khan port city, Vladivostok aṭanga km 50 vela hla, Knevichi airfield-ah Shoigu hian lo dawngsawngin, guard of honour pek a ni. Hemi hnu hian Shoigu hian Russia strategic bomber, Tu-160, Tu-95 leh Tu-22M3-te chu a enpui. Russia Ministry chuan heng bomber-te hi nuclear ralthuam phur thei leh, Russia nuclear air attack force innghahna pawimawh an ni tih a sawi. Kim hian aircraft aṭanga missile kah chhuah dante pawh a zawt dil chhut hle.

Shoigu hian MiG-311 supersonic interceptor aircraft, 'Kinzhal' hypersonic missile nena thuam pawh a enpui. Kizhal, dagger tih bawk hi air-launched ballistic missile niin, nuclear leh conventional warhead phur thei a ni. Ri chakna aia a let 10-a chakin, kg 480 chin phurin km 1,500 - 2,000 thleng a thlawk thei a ni.

Aircraft leh missile-te an enpui hnuah, Kim hian Vladivostok-ah Russia warship rualte a enfiah leh.

Kar liam ta Zirtawpni khan Kim hian Russia fighter jet factory a lo endik tawh bawk a ni.

Kim leh Russia president, Vladimir Putin-te chuan kar liam ta Nilaini khan meeting neiin, ram pahnih sipaite thawh dun theih dan turte pawh an sawi dun nia tarlan a ni. Putin chuan dan bawhchhe zawnga chet an tum loh thu a sawi rualin, North Korea nen an inlaichinna chu siam ṭhat zel a tum thu a sawi. Hruaitu pahnihte inbiaknaah hian thawh dunna tur inremna thuthlung ziah an nei hran lo tih Kremlin thupuangtu, Dmitry Psekov chuan a sawi. Heti chung hian US leh NKorea ṭhenawm ramte chuan Kim leh Putin inkawmna leh, ram pahnihte inlaichinna chungchang hi an ngaihvenin, an sawisel nasa hle thung.

Nimin zing khan Kim hian a private train hmangin, Russia khawchhak lama Artyom railway station a chhuahsan a, an ram lam a pan a ni.