Libya ramah ruang zawn hna thawh chhunzawm zel

Libya ram khawchhak lama tuilianin chhiatna nasa tak a thlen avanga tuipui kam, Derna khawpuia thi zat chu mi 11,300 an tling tawh. In chim leh hnawmhnawk karah ruang zawn hna thawh chhunzawm zel a la ni a, tuipui aṭangin tuiin ruang tam tak a rawn len chhuak tawh bawk.

United Nations chuan nimina report a tihchhuahah, tuilian tuar nasa ber Derna khawpui bikah thi zat hi 11,300 an tling tawh a, hmun dangah thi 170 vel an awm bawk niin a sawi. Chin hriat loha awm hi mi 10,100 an tling bawk a, himna zawnga hmun danga tlanchhia hi 40,000 vel an awm. Ruang hi hmuh belh zel a la nih avangin thi zat pawh hi an la pun chhoh hle a rinawm.

UN Office for the Coordination of Humanitarian Affairs (OCHA) chuan tuilian tuartu zinnga naupang nuai 3 vel chu cholera, malnutrition, diarrhea leh dehydration nei mai thei dinhmunah an ding tih a sawi.

Ram hrang hrangte chuan Libya ram tan ṭanpuina leh chhawmdawlnate an thawnl ut mek zel. Damdawi, ei tur, tent, blanket leh an mamawh dangte bakah, ruang dahna tur body bag-te an thawn. Hei bakah hnawmhnawk thenfaina tur khawl liante pawh an thawn tel bawk. Hetih lai hian Libya ram hi sorkar pahnih, an ram khawpui Tripoli leh khawchhak lamah sorkar hran an awm avangin chhanchhuah hna thawhna kawngah duh angin hma lak chak a har nia sawi a ni.