Libya police center-a bomb puakah mi 65 an thi

Libya rama Zliten khua police training center-ah Ningani khan bomb a puak a, mi 65 an thi.

Mayor Miftah Hamadi chuan bomb hi police lak tharte ko khawm an nih laia tihpuah a nih thu a sawi a, mi 65 an thih bakah mi dang eng emaw zatin hliam an tuar bawk. Bomb puah lai hian center-ah hian mi 300 vel an awm. Police center beih a nih hnu lawkah hian checkpoint-ah car bomb tihpuah a ni bawk a, mi paruk an thi a, thi zingah hian nausen a tel. Pawikhawihna thleng hi eng pawl mahin an tih niin an la chhal lo a, mahse thuneitute chuan a hmaa pawikhawihna lo thlen fotu, Islamic State (IS) firfiak pawl tih niin an ngai.

Kum 2011-a Libya hotu Muammar Gaddafi-a paihthlak a nih hnu khan Libya ramah hian Islam firfiakte pawikhawihna a thleng zui reng a, sorkar pahnih a din avangin ram rorelna pawh a la mumal lo hle. Tualchhung buaina chhuak reng karah, Islamic State (IS) firfiak pawl chuan Libya ramah an huang zauh tumin hma an la a, Sirte khawpui an lak tawh bakah oilfield-te lak tumin an bei chhunzawm bawk. Tunkar tir lam pawh khan firfiakte hian oil export terminal lian pahnih an bei a ni.