Yemen-a Iran embassy beih dan chhui dawn

Saudi Arabia chuan Saudi sipaiten Yeman-a Iran embassy an bomb nia Iran-in a puhna chu a chhuichiang dawn.

Iran chuan Yemen khawpui, Sanaa-a a embassy chu Nilaini zan khan Saudi Arabia thlawhtheihna hmanga bomb niin a sawi a, embassy guard eng emaw zatin hliam an tuar niin a sawi bawk. Yemen ramah hian Saudi kaihhruai Arab ram ṭangrualte chuan Houthi helpawl lakah beihpui an thlak a ni.

Saudi kaihhruai ṭangrual pawl thupuangtu, Saudi Brigadier Gen Ahmed Asiri chuan Sanaa-a Houthi helte hian rocket hmangin Saudi Arabia an bei a, hemi chhan letna atan hian helho lakah hian nasa taka beihpui an thlak thu a sawi. Houthi helte hian civil mite chenna hmunte an hmang a, hei bakah hian embassy luah tawh lohte pawh tawmbuk atan an hmang tel bawk a ni, a ti. Beihpui an thlak hma hian ram hrang hrangte hnenah Sanaa-a an hmun pawimawh leh an palaite awmna hmunte pawh hriattir vek tura an hrilh thu a sawi bawk.
Sanaa chengte chuan Iran embassy hi a landanah engmah chhia a awm lo a, bomb a nihna hnuhma hmuh tur pawh a awm lo niin an sawi bawk.

Saudi Arabia-in tun hnaia firfiak zawnga chetnaa inhnamhnawiha thiam loh a chantir, mi 47 a tihhlum zingah Shia cleric a tel a, hei hi Iran chuan nasa taka sawiselin, Iran mipui thinrim chuan Tehran-a Saudi embassy chu beiin an hal hial a ni. Hei vang hian ram pahnihte inkar boruak pawh a chhe hle a, Saudi Arabia chuan Iran nena an inpalai tawnna pawh titawpin a palaite pawh a ko haw a, an ram-a Iran palai awmte pawh a hnawtchhuak bawk a ni.