Mexico Police-te'n El Chapo an man US-a thawn dan tur an buaipui dawn

Mexico Police-te chuan ruihhloa sumdawng lian, Sinaloa Cartel hotu, Joacuin 'El Chapo' Guzman chu an kar kalta Zirtawpni khan an man nawn leh a, attorney general office chuan US-a thawn a nih theih dan buaipui nghal a nih tur thu a sawi.

Zirtawpni zing khan Guzman hi Sinaloa state-a Los Mochis khaw hmarthlang lamah man a ni. Police-ten a bihrukna hmun an dap hian tuipaihna aṭanga tlanchhuah ruk a tum a, mahse an nangchin hman a ni.

Guzman man tuma an beihnaah hian sipai pakhatin hliam a tuar a, Guzman-a mi leh sa nia hriat mi panga kahlum an ni bawk. Man a nih hnuah, thla ruk liamtaa a tlanchhuahna tan-in ah dah luh leh nghal a ni.

Khawvela ruihhlo-a sumdawnnaa man tura an zawn nasat ber zinga mi, Guzman hi kum 2015 July thla khan tan-in a pindan chhunga bual-in hnuai lei, mel khat dawna thui verh aṭangin a tlanchhuak a ni.

Hei hi tan-in aṭanga ṭum hnih a tlanchhuahna a ni a, kum 1993 khan Guatemala-ah man a ni a, Puen≠te Grane Jail aṭangin kum 2001 khan a lo tlanchhuak tawh bawk.

Attorney General Loretta Lynch chuan Guzman hian Mexico chauh ni lo, ram hrang hrangah tawrhna leh buaina a thlentir nasa hle tiin a sawi. Kum 2014 khan US chuan an rama ruihhlo tawlhruk kaihhnawihah Guzman hi US-a thawn turin Mexico sorkar a lo ngen tawh a, thubuai tam tak hmachhawn tur a nei dawn niin a sawi.

Kum 2013 khan Chicago Crime Commission chuan Guzman hi 'Public Enemy Number One' tiin a lo vuah tawh a, hei hi US federal district court dang pasarih pawhin an pawmpui a ni.

Thla ruk liamtaa jail aṭanga a tlanchhuah hnu khan Guzman hi man tuma zawn reng ni mah se, mi leh sa a neih ṭhat avangin a bibo thei zel a ni.

Mexico official-te chuan a awmna chin hi hriat a harsa thei hle tih an sawi a, mahse tun hnaiah lemchan thiam Sean Penn-a nena a ruka interview an neihna aṭangin a awmna chin hi an chhuichhuah theih phah ta niin an sawi.

Guzman hian lemchan thiam leh producer te chu a chanchin hrilh theih dan kawng zawngin biak pawh a tum ṭhin a, heta aṭang hian thuneitute chuan an chhui theih phah a ni. Nikum October thla khan Sean Penn hian Durango state-a thingtlang hmun pakhatah interview a lo neihpui a ni. Thuneitute chuan thingtlang hmuna a awm lai hian hmeichhe pahnih leh naupang pakhat a awmpui tel avangin an bawhzui duh lo a, a awmna chin hi chhui zawm zelin, Los Mochis, Sinaloa-ah hian an man thei ta a ni. Sean Penn-a'n a kawmna hi Inrinni zan khan Rolling Stone magazine website-ah tihchhuah a ni.