NKorea hotu-in n-bomb tam zawk enchhinah a vau

North Korea hotu Kim Jong-un chuan tun hnaia hydrogen bomb an enchhin avanga khawvel ram hrang hrangin an sawiselna chu nimin khan chhang letin, nuclear bomb tam an la enchhin tur thu a sawi.

Nimin khan Kim hian nuclear test hlawhtling taka an nei thei chu hnehna ropui tak a ni tiin, scientist-te chu a fak a, nuclear bomb hi an la enchhin chhunzawm zel dawn tih a sawi. Kim hian nuclear test neihnaa thawktu, scientist leh technician-te chu thla a lakpui nghal a ni.

Khawvel ram hrang hrangin nasa takin sawisel mah se, Kim hian hydgrogen bomb an en≠chhin chu an ram venhimna tura an hmalakna pakhat a ni, a ti a, US kaihhruaia ram dangte'n nuclear war an thlen thulhah an ram lo invenna tur a ni, a ti.

North Korea hian kar kalta Nilaini khan hlawhtling takin hydgogen bomb a enchhin tih a sawi a, hei hi US leh mithiam ṭhenkhat chuan an ringhlel a, mahse a dik ngei leh ngei loh an finfiah thei lo.

NKorea ṭhianṭha, China pawh engmah hrilh lawk a nih loh avangin a lungawi lo hle.

Nuclear test a nih hnu hian a vawikhatna atan South Korea leh Japan sipai hotute chu inbiain chanchin an inhrilhtawn a, NKorea thiltih hian ram pahnih sipaite hi thawhdunna ṭha zawk a siamsak phah a ni.

South Korea pawhin ramri
aṭanga North lam hawia loudspeaker broadcast a neih ṭhin pawh a chhunzawm leh nghal bawk.

Loudspeaker hmang hian North Korea hotu, Kim Jong-un leh a kaihhruai sorkar thil tih dik lote chu North lama chengte hriat theih turin an puangchhuak ṭhin a ni.

South Korea President Park Geun-hye chuan Nilaini-a ram mipuite hnena thuchah a sawi turah, North Korea nuclear test chungchang hi a sawichhuah ngei rin a ni. United Nations Security Council pawhin North Korea hremna pek dan tur hi ngaituah a tum.