Iran leh Saudi buainain Syria talk nghawng dawn lo
Saudi Arabia leh Iran chuan an inkar buainain Syria tual≠chhung buaina tihreh a nih theihna atana hmalaknaah nghawng ṭha lo a neih phah dawn lo tih an sawi.
Syria tana UN palai, Staffan de Mistura chuan Tehran-ah Iran Foreign Minister Javad Zarif a hmu a, Iran minister hian Saudia Arabia nena an inkar boruak ṭha lo chuan Syria buaina chinfel dan kawng zawng≠a tun thla tawp lama Syria talk neih tur a nghawng buai phah dawn lo tih a lo hrilh a ni.
Syria chungchang ngaih≠tuah≠a inbiakna hi January 25 hian Geneva-ah neih ṭan tum a ni.
Pathianni-a Arab League meeting-a tel, Saudi Foreign Minister Adel al-Jubeir pawhin Syria tana remna leh muanna kawng zawnga hmalak mekna chu Iran nena an inkar boruak
ṭha lo chuan a tihbuai phah dawn lo tih a sawi bawk.
January 2-a Saudi Arabia-in firfiaka chetnaa inhamhnawiha puha mi 47 a tihhlum zingah Shiite cleric Nimr al-Nimr a tel avangin Iran nena an inkar boruak hi a chhiat phah hle a, Middle East ram hrang hranga Shitte muslim-te chuan an lungawi lohna nasa takin an lo lantir tawh bawk.
Iran mipui thinrim chuan Tehran-a Saudi embassy beiin an hal a, hei vang hian Saudi chuan Iran nena palai an intirh tawnna chu a tihtawp nghal a ni.