Syria mipuite chhawmdawlna tur UN-in thawn dawn

Syria rama Madaya khua mipuite chu ei tur tlachhamin an awm mek a, United Nations chuan khaw mipuite chhawm≠dawlna tur thawn luh thuai a tum.

Madaya khua hi Syria helho kutah a awm mek a, chhawmdawlna phurtu motor-te chu Pathianni khan an khuaah an luh hman beisei ni mah se, helho hian an lo dang khawtlai a ni.

Madaya khua hi Le≠banon ramri bula awm niin, mi 40,000 vel an cheng a ni.

Mipuite hian ei tur an neih tawh loh avangin an ran vulh leh hnimhnahte chaw-ah an ring tawh nia sawi a ni.

UN refugee agency thupuangtu, Melissa Fleming chuan nimin zing khan UN convoy chu Madyaa khaw pan hian tirhchhuah an nih thu a sawi a, mahse eng hunah nge an thlen theih ang tih erawh sawichian theih a ni lo.

Medical charity, Medicins Sans Frontieres (MSF) chuan Madaya khaw mipuite dinhmun pawh sawi hrehawm khawpin a chhe tawh niin a tarlang a, mi 250 chuan ei tur ṭha hmuh loh avangin harsatna an tawk tawh a ni, a ti.

Heng mite hi enkawl thuai an nih loh chuan an thi mai dawn niin a tarlang bawk.

World Food Prog≠ramme (WFP) pawhin Madaya khaw tan hian ei tur leh damdawite thawn luh a lo tum tawh a, mahse tihkhawtlai a nih chhan erawh hriatchian a ni lo.

Media report chuan helho leh sorkar sipaite an inbeih chhunzawm reng avangin ṭanpuina hi thawnluh a buai≠thlak hle tiin an tarlang a, chhawmdawlna thawn luh dawn pawhin hel leh sorkar lam aiawhte remtihna an neih a ngai a ni.

Hun rei tak Syria ram tualchhung buaina thleng avang hian mi maktaduai 4.5 vel chu dinhmun harsa takah an awm mek a, an zingah hian mi 400,000 vel chu tlawhpawh mai theih a nih loh avangin chhawmdawlna pawh an dawng thei lo nia sawi a ni bawk.

Helhoin an awp mek, Foah leh Kefraya khuaa cheng, mi 30,000 vel dinhmun pawh a chhe tawh hle nia hriat a ni.

Kum nga dawn tualchhung indona a thlen tawh avangin mi 250,000 chuangin an thih phah tawh a, mi maktaduai 11 vel chuan himna zawngin an in leh lo an tlanchhiatsan tawh bawk.