Catalonia hruaitu tharin inlakhranna tur kalpui zel dawn

Spain aṭanga inlakhran duh, Catalonia regional president atana thlan thlar, Carles Puigdemont chuan inlakhran tumna chhunzawm zel a, an bial mipui tam zawkte'n an hmalakna an thlawp theihna tura beih a tum thu a sawi.

Catalonia president atana thlan thar a nih hnua regional assembly-a thu a sawiah, Puigdemont chuan Spain aṭanga an indanna tur chu thla 18 chhunga tihfel hman a tum thu a sawi a ni.

Regional president thlannaah hian member 70 zinga 63 in president atan Puigdemont hi an thlawp a ni.

Hetihlai hian Spain Prime Minister Maria≠no Roy chuan an ram
ṭhendarh an remti dawn lo tih sawi nawn lehin, an inpumkhatna turin theihtawpin a bei chhunzawm zel dawn tih a sawi.

"Sorkar chuan Spain ram inpumkhatna tichhe thei thil engmah a thlen a remti dawn lo" a ti. PM chuan inthlanpui neih lehah eng party pawhin sorkarna siam se, sorkar ngelnghet siam leh, inlakhran tumna dan chu a tum ber tur a ni, a ti.

Catalonia regional president atana thlan thar, kum 53 mi, Puigdemont hi chhang urtu fapa niin, Spain aṭanga inlakhran thlawp rengtu a ni.

Kum 1980-a CDC party a zawm a, hetihlai hian Catalonia independence kher lo a, thuneihna sang zawk pe tura an phut lai pawh khan inlakhran zawk a duhzia a lo lantir tawh ṭhin. Puig≠demont hian a cabinet thar turte a ruat fel thuai rin a ni.