Fossil fuel tihtawp phûtin New York-ah kawng zawh
Sik leh sa inthlak danglam chak lutuk siam ṭhatna kawnga hma la tura thuneitute phûtin, United Nations General Assembly neihna tur, New York khawpuiah Pathianni khan mi sing chuangin kawng an zawh.
Kawngzawhnaah hian organisation leh activist group 700 an tel a, mihring hma hun chu fossil fuel tihtawpah a in nghat tia au rualin, "Fossil fuel-te hian min that mek" tih leh "Meialh leh Tuilian tuar turin vote ka thlak lo" tih thuziakte an keng a ni.
Kawngzawh zinga mi tam zawk chuan US president Joe Biden chu na takin an dem a, oil leh gas project thar siam phalna pe tawh lo tur leh, a awm sa pawh titawp a climate emergency puang turin an phut.
Tun thlaa UN cimate report-in a tarlan danin, kum 2025 hi khawvel puma greenhouse gas emission a tam ber tur a ni a, 2015 Paris Treaty hian zawm ṭhat a hlawh chuan, kum 2025 hnuah hian greenhouse gas emission hi nasa takin a tlem dawn a ni. Paris agreement thil tum pakhat - kum 2050-a khawvel hi zero carbon emission hmuna siam tur chuan, emission tihtawp theih lohna fossil fuel project zawng zawng chu tihtawp a ngai dawn a ni.
Center for Popular Democracy director Analilia Mejia chuan hmanhmawh taka hmalak a hun tawh tih sawiin; Canada, Hawaii leh Greece-a ram kang te, Libya-a tuiliante aṭang hian climate change nghawng natzia a lang chiang tih a sawi.
Khawvela oil leh gas laih chhuah hmun thuma ṭhena hmun khat chu US ta a ni a, kum 100 chhung hian US hian ram dang zawng zawng aiin carbon dioxide a pe chhuak hnem zawk.
Pathiannia kawngzawhnaah hian US Congresswoman Alexandria Ocasio-Cortez leh lemchan thiam Susan Sarandon, Ethan Hawke, Edward Norton, Kyra Sedgwick leh Kevin Bacon-te pawh an tel a, kawng zawh zawng zawng hi mi 75,000 chuang nia chhut a ni.