Myanmar-in China leh India tan visa on arrival phalsak dawn

Myanmar chuan an ram tlawhtu, China leh India aṭanga khualzin kalte chuan an ram an thlen hnua visa dil chawp theihna tur, visa on arrival a phalsak dawn tih a sawi.

Sipai sorkar immigration ministry chuan he scheme hi kum khat chhung an kalpui chhin phawt dawn tih sawiin, hman ṭan thuai a nih tur thu a sawi bawk. Heng ram pahnih aṭanga khualzin kalte chu security kaihhnawih thil avanga restricted area-a puan tih loh, hmun dang chu an tlawh phalsak vek an ni ang, a ti bawk.

Tunah rih chuan China leh India aṭanga zin turte hian kal hmain online emaw, Myanmar embassy-ah emaw a hmain tourist visa hi an dil lawk phawt a ngai ṭhin.

Sipai rorelna hnuaiah Myanmar ram hi hun rei tak an inkharkhip hnuah kum 2011 aṭang khan khualzinte tlawh theih turin an inhawng ṭan a, tlawhtu pawh an ngah ṭhin hle. Hetih lai hian kum 2021-a sipaite'n civil sorkar paih thla a, thuneihna an hnehchhuh hnuah tualchhung buaina nasa tak a thleng a, tun thlengin an buaina hi a la reh lo. Hei vang hian US leh Australia bakah khawthlang ram ṭhenkhat chuan an mi leh sate chu Myanmar ram hi tlawh rih lo turin an chah a ni.