Chinese Foreign Minister-in Russia a tlawh

China foreign minister Wang Yi chuan ni li cham turin nimin khan Russia-ah a zin.

Wang Yi hian October thlaa Russia president Vladimir Putin-a'n Beijing a tlawh tur chungchanga inbuatsaih lawkna ni pah fawmin Russia hi a tlawh a, a cham chhung hian ram pahnihte inrin tawnna thuk zawk pawh an siam rin a ni.

China Foreign Ministry chuan rorel lai, Communist Party foreign affairs hotu, Wang hian kum tin an lo neih ṭhin angin Russia security council secretary, Nikolai Patrushev chu security chungchang sawipuin a hmu dawn tih a tarlang. Russia foreign minister Sergei Lavrov pawh a hmu dawn bawk a, ram pahnihte inkar thil hrang hrangte a sawipui bawk ang.

China president Xi Jinping-a'n Beijing-a Belt and Road Forum vawi thumna an neih tur hmanpui tura President Putin a lo sawm tawhna chu a hlawhtlin theih nan Wang hian palai hna a thawk nghal dawn a ni.

Putin hian kum 2017 leh 2019 khan Belt and Road Forum vawi khatna leh vawi hnihna a lo hmanpui tawh a ni. Mahse International Criminal Court (ICC)-in dan loa naupang 100 chuang Ukraine-a a thawn kir avanga arrest warrant a tihchhuah hnuah, Putin hi ram pawnah a zin leh tawh rih lo. September 1 khan Putin chuan China President hmuh thuai a tum tih a sawi a, mahse, China-ah a zin ngei dawn em tih erawh a sawi lo thung.

Hetih lai hian ICC chuan member ram 123-ah, Putin chu an rama a luh chuan lo man a, Hague-a thawn tura hriattirin arrest warrant hi an tichhuak a ni.