Pakistan-ah Afghanistan peace talk nei

Afghanistan rama remna leh muanna a awm theih dan kawng zawngin Thawhṭanni khan Pakis≠tan ramah peace talk neih a ni.

Islamabad-a Afghanistan peace talk neihah hian US leh China sorkar aiawhte pawh an tel a, Afghanistan sorkar leh Taliban aiawhte'n inbiakna an neih thuai a ṭul thu an sawi.

Afghanistan, Pakistan, China leh US telna, Quadrilateral Coordination Group chuan January 18 hian Kabul-ah meeting neih leh a tum a, hetah hian Afghanistan rama remna a awm theihna atana hmalakna tur ruangamte siam an tum.

Taliban senior official, Mohammad Hassan Haqyar chuan Taliban leh Afghanistan sorkar inkara buaina awm chu sipai chakna hmanga chinfel chi a nih loh thu leh, tualchhung indona thleng chu inbiakna hmanga chauha tihtawp theih a ni, a ti.

Haqyar chuan tunhma lamin inbiakna kalpuina tura hmalakna chu a chak tawk lo tih a sawi a, "Mahse tunah chuan thil awmdan a inthlak tawh a, Afghan sorkar, America leh Pakistan te pawhin inbiakna neih hi an duh tak tak tawh niin a lang," a ti.

Afghanistan sorkar leh Taliban-te hian peace talk neih hi an lo tum tawh ṭhin a, mahse a hlawhtling thei lo a ni. Taliban hruaitu thar atana Mullah Akhtar Mohammad Mansour ruat a nih hnuah an pawl chhunga innghirnghona awmin, ṭan lam inang lo neiin an awm chho a, hei hi sorkarin inbiakna a neihpui hunah pawh a hriatchian a ngai dawn nia sawi a ni. Mullah Mohammad Rasool Akhund-a lamṭangte chuan Mansour hi an hotu atan an pawm lo a, US, China leh Pakistan nena inbiakna neih pawh an duh loh thu an sawi.

Taliban-te hian US leh NATO sipaite'n Afghanistan mission titawp a, kum khat liamtaa an chhuahsan aṭang khan Afghanistan ram chhungah pawikhawihna an thlen fo a, Afghan security force-te nen pawh an inbei chhunzawm reng a ni.