US-a El Chapo thawn dan tur buaipui rei dawn
Mexico police-te'n drug lord, Joaquin El Chapo Guzman an man nawn leh hnuah, US-a thawn dan tur buaipui nghal a ni dawn tih sawi mah se, hei hian hun a duh rei dawn a, kum khat vel tal a ngai dawn nia sawi a ni.
Nikum July thlaa jail aṭanga a tlanchhuah hnuah, kar kalta Zirtawpni khan Mexico police-ten Guzman hi Los Mochis-ah an man leh a, Pathianni aṭang khan Mexican law hnuaiah US-a thawn a nih dan tur hi buaipui ṭan nghal a ni tih attorney general office chuan a tarlang.
US chuan Guzman hian ruihhlo tawlhruk avangin an ramah thubuai hmachhawn tur tam tak a nei tih a sawi a, Mexico sorkar hnenah hian an rama thawn turin a lo ngen tawh a ni.
Zirtawpni-a man a nih hnuah Guzman hi nikum July thlaa a lo tlanchhuah tawhna, Altiplano jail-ah dah luh leh nghal a ni.
Mexico national security commissioner chuan jail-ah hian international security protocol duh dan anga venhimna pawh kalpui a nih thu leh, nikuma Guzman-a a tlanchhuah hnu khan venhimna lam pawh tihchangtlun a ni, a ti.
Jail-ah hian tangte leh prison staff-te chet vel dan thlithlaina tur pawh dah tel a ni tawh bawk.
Nikuma Guzman a tlanchhuah dawn khan a tanna cell bual pindan zawna chhuak turin lei hnuaiah km 1.5 zet thui lei verh a ni a, a tlanchhuah aṭanga minute 20 chuang hnuah chauh guard-te pawhin an hrechhuak a ni. Hei vang hian he thilah hian jail-a thawkte inhnamhnawih tela rinhlelh an ni a, prison director leh guard eng emaw zat chu man an ni.
Guzman man a nih leh hmaa interview neihpuitu, Hollywood actor Sean Penn chungchang chu chhui a nih dawn leh dawn loh Mexico sorkar chuan a ngaihtuah a tum.
Kum 2015 July thlaa jail aṭanga a tlanchhuah hnu khan Guzman hi man tuma zawn reng a ni a, mahse a awmna chin hriat theih a ni lo. Nikum October thla khan Sean Penn hian a rukin Guzman hi a hmu a, interview a neihpui a, heta ṭang hian a awmna chin hi an chhui theih phah ta a ni.
Penn chuan Guzman nen an inhmuh theihna hi Mexican actress Kate del Castillo-i ruahman a nih thu a sawi a, Guzman hian a chanchin film-a siam turin Castillo-i hi a duh niin prosecutor-te chuan an sawi.