Malaysia Parliament-a eptu pawl member-te chuan an rama politics buaina awm mekah prime minister Muhyiddin Yassin chuan Parliamen rorel ṭhutkhawm a koh duh loh avanga lungawi loin, PM hi bang tura phutin nimin khan Parliament building panin kawng an zawh.
Nimin aṭang khan Parliament final session hi neih tur a ni a, mahse PM hian rorel inkhawm neih hun tur hi a tikhawitlai a ni. Tikhawtlai a nih chhan hi an rama Covid-19 hri kai an pun chhoh vang niin a sawi a, mahse eptu lawm chuan a rorel dan dik tawk lo avanga chapchar tum eptute lamte dan a tumna vang zawk niin an puh thung.
Eptu member-te hian Parliament building panin PM bang tura phutin kawng an zawh a, mahse kawng lakah police-ten an lo dang a ni.
Police-te an lo dan hnua thu a sawiah, eptu pawl hruaitu Anwar Ibarhim chuan prime minister atangin Muhyiddin chu paihthlak a ni dawn tih sawiin, eptu pawla roreltu 107-te chuan hnathawk thei lo Parliament member-te a siam chungchangah te, ram danpui leh Lal thupek kalhah a chet avang tein PM hi bang tura nawrna an inlungural vek tih a sawi bawk.
"Politics-a hun rei tak kan buainate chu heti kawng zawng chiah hian kan titawp thei dawn a; hriselna, ram eibar zawnna leh tualchhung buainain thla 17 liamta aṭanga min tihbuai tawhnate chu a chinfel theih turin hma kan la thei chauh dawn a ni," tiin PM hlui Mahathir Mohamad chuan a sawi.
Malaysia-ah hian nikuma rinlawk loh deuha PM aṭanga Mahathir a ban hnu leh, March 2020-a thuneihna a chan hnuah hian politics buaina an nei chho reng a, rorelna thlak duhin mipui pawhin an lo nawr tawh bawk. Muhyiddin hian Parliament-ah 'thin majority' chauh a neih phak a vangin a kaihhruai sorkar pawh a nghet lo hle a ni.
Malaysia lal thupek chu Muhyiddin kaihhruai sorkar hian a zawm duh loh avangin kar liam lam pawh khan PM hi bang tura nawr a lo ni tawh a ni. Lal-in an rama hripui leng kaihhnawihna ordinance siam tihtawp a nih chungchang chu Parliament-a sawiho turin a ti a, mahse sorkar lam hian hei hi a ṭul lo nia sawiin a hnawl a ni. Hei vang hian Malaysia lal pawh a tihdan ngai lo tak angin sorkarin a remtihna tel loa hri leng vanga emergency puan laia ordinance tihchhuah a lo tihtawp ngawt chungchanga sorkar sawiselna pawh a tihchhuah phah hial.
Lal thupek tihchhuah a nih hnuah eptu pawl hruaitu, Anwar chuan Parliament-ah PM Muhyiddin rin tawk lohna motion a pu lut nghal a, mahse Parliament session ṭhulh anih tak vangin he motion chungchangah hian vote lak a ni dawn em tih leh, ordinance-te pawh pharh leh a ni dawn em tih hriat theih a ni ta lo a ni.
