South Korea President, paihthlak a nih dawn leh dawn loh chungchang ngaihtuah mek, Yoon Suk Yeol chu nimin khan law enforcement official-ten an man. South Korea chanchina President ni lai man hmasak ber a ni.
Yoon Suk Yeol hi December thla tir lama an rama sipai thuneihna sang hmanna tur, martial law a puan avangin Parliament chuan President a nihna aṭanga paihthlak rawtna hi a pawm a ni. Martial law hi darkar rei lote hnuah sut leh nghal mah se, Yoon hi President a nihna aṭangin chawlh lailawk tir a ni a, Constitution Court chuan a chungthu hi ngaihtuahin, paihtlak a nih dawn leh dawn lohah thutlukna a la siam ang.
Tun thla tir lam khan Yoon manna tur thupek hi court chuan a ti chhuak a, mahse man tuma kal anti-corruption investigator leh police officer-te chu Presidential Security Service (PSS) chuan lo dangin, darkar ruk vel an inep hnuah an kir san a ni. Hemi hnu hian Yoon manna tur thupek hi tih chhuah leh a ni a, nimin zing khan man turin anti-corruption investigator leh police officer 1,000 chuang an thawk chuak a ni. President chenna in an luh theihna tura daidanna chhawng thum siam chu an paltlang hnuah, Yoon chenna inah hian lutin, buaina nasa lutuk awm loin an man ta a ni.
Kum 64 mi, Yoon hi martial law a puan chungchangah sorkar leh thuneitute lakah helna chawh chhuah tuma puhin thubuai siamsak a ni. Man a nih hnu hian investigator-te chuan thu an zawtfiah nghal a, mahse thu an zawh chhung zawng hian chhanna pe duh loin a ngawi reng tih an sawi.
Yoon-a lawyer-te chuan man a nih dan hi dan kalh tiin an sawi a, anti-corruption agency hian a thubuai siamsak hi chhui turin thuneihna an nei lo tih an sawi. Yoon pawhin man a nih hma lawka video clip a siamah, amah manna tur thupek tih chhuah chu dan ang taka tih a ni lo tiin a sawi ve bawk. Mahse, Supreme Court leh justice ministry official-te chuan arrest warrant hi dan ang taka kalpui a ni tih an sawi thung.
Eptu pawl, Democratic Party hruaitu, Park Chan-dae chuan Yoon man a ni ta chuan South Korea-ah dik taka rorelna kalpui duhna a la nung zel tih a ti lang a ni, a ti. An ram danpui zawm a, democracy leh dan leh thupek dik taka kenkawhna tura hma lakna a ni tiin a sawi.
President a nihna aṭanga Yoon hi chawlh lailawk tir a nih hnuah acting president atan prime minister Han Duck-soo chu ruat a ni. Mahse a ni pawh hi eptu pawl tamna, Parliament-ah paihthlak rawtna a tlang leh tak avangin finance minister, Choi Sang-mok chu acting president in a awm mek a ni.
