Kumina Shri Amarnath Ji Yatra neih tur atana inbuatsaihna leh venhimna kalpui dan hrang hrang chu union home minister Amit Shah hoin nimin Zirtawpni khan Delhi-ah thlir ho a ni. Meeting-ah hian sorkar laipui leh Jammu & Kashmir sorkar hnuaia thuneitu liante an tel.
Amarnath Yatra hi July ni 3 aṭanga ṭanin ni 57 chhung hman tur a ni a, metre 3,880-a sanga awm sakhaw hmun pawimawh tlawh tura biakzina kalte tluang taka an kal theih nan leh an himna dinhmun ngaihtuahin HM hian Central Armed Police Forces (CAPF), Jammu and Kashmir Police leh intelligence agency hrang hrangte hnathawh dan a thlir a ni.
High-level meeting-ah hian National Security Advisor (NSA) Ajit Doval, J&K Lt Governor Manoj Sinha, Army Chief Gen Upendra Dwivedi leh CRPF DG GP Singh-te bakah sorkar hotu liante an tel. Venhimna hna thawhna hmun hrang hranga ralthuam hman tur, drone thlithlaina leh 'Pahchan App' hman dante pawh an sawi ho nghal.
Biakzina kal turte hi shrine pan tur hian Anantnag district-a Nunwan-Phalagam route, km 48-a thuiah an kal dawn a ni. A kalkawng tawi zawk, Ganderbal district-a Baltal route chu km 14 vel ni mah se a kawng a chhuk chhoin kal a harsa hle a ni. Tunkar tir lam khan Lt Governor Sinha chuan inpuahchahna hi a lo enfiah tawh bawk a, department leh security agency hrang hrangte chu infrasture, security, healthcare, sanitation, connectivity leh pilgrim service tan ruahmanna felfai tak siam turin a hrattir a ni.
