India Republic Day vawi 76-na lawmna, January 26-a neiha khuallian tur, Indonesia president Prabowo Subianto chuan Ningani,January 23 khan India a rawn thleng.
Prabowo Subianto hi India a rawn zin ṭum khatna niin, Indonesia President zingah Republic Day-a khuallian ni thei palina tur a ni bawk. An President hnung rawn zuiin, Republic Day parade-ah Indonesia aṭang hian member 352 awmna marching leh band contigent pawh an inlan dawn a ni.
Prime minister Narendra Modi chuan vawiin hian Hyderabad House-ah Subianto hi lo thlengin, official level inbiakna an nei nghal dawn a ni. Meeting-ah hian ram pahnihte hian thawhdunna tur MoU eng emaw zat an ziah rin a ni bawk. Subianto hi President Droupadi Murmu-in Rashtrapati Bahvan-a 'At Home' reception a buatsaihah a tel dawn bawk a, vice president Jagdeep Dhankhar nen an inkawm bawk ang.
Kumin Republic Day lawmnaah hian state 16 leh union territory aṭangin tableaux 31 leh, ministry leh service lam aṭangin 15 pholan a ni dawn. IAF lam pawhin an ralthuam leh hmanrua neih hrang hrangte an pholang leh dawn a, mahse kumin hian Advanced Light Helicopter(ALH) chu coast guard chetsualna thleng avang khan pholan a ni ve dawn lo thung. Aircraft leh helicopter 44 pholan an ni dawn a, fighter 22, transport aircraft 11 leh helicopter pasarih te pholan tum a ni.
Republic Day lawmna pui ber, Delhi-a neih turah hian a hmunah mi 70,000 velin an chhim thei dawn a, an zinga mi 10,000 chu a bika sawmte an ni. Kumin parade-ah mi 5,000 vel an tel dawn bawk.
Venhim hna t hawk turin Delhi-ah hian paramilitary company 70 leh police 15,000 chuang an duty dawn. Khawpui chhung chu drone leh CCTV hmanga vil reng a ni dawn a, heng hna hi cyber-specialist officer ten an enpui dawn a ni. Khawpui chhungah hian FRS awmna motor pawh tlan kual tir a ni ang.
