Sushma Swaraj-in Palestinine leh Israel a tlawh dawn

External Affairs Minister Sushma Swaraj chuan January 17-18 hian Israel leh Palestine a tlawh dawn a, minister a nih anga a tlawhna hmasa ber tur a ni.

January 17 hian Palestine a pan ang a, an ram hruaitute kawmin, ram pahnihte'n thawhdunna leh inhriatthiamna ṭha zawk an neih theih dan turte a sawipui ang.

India hian Palestine mipuite dinhmun chawikanna turin project eng emaw zat a kalpui mek a, school building te a sak bakah, Palestinian zirlaite tan scholarship te a siamsak bawk. Swaraj-i hian Ramallah khuaa Palestine Digital Learning and Innovation Center pawh hawng nghal dawn a ni.

Hemi ni vek hian minister hian Israel panin, January 18-ah Israel ram hruaitute a kawm leh ang.

Israel leh India hian inlaichinna ṭha tak an nei mek a, India hi Israel-in sipai hmanrua a siam leitu ram lian ber a ni. India sipaite tan Israel hian weapon system, missile leh unmanned aerieal vehicle-te a lo supply tawh ṭhin a ni.

President Pranab Mukherjee chuan nikum October thla khan Tel Aviv a lo tlawh tawh a, India President zinga Juda ram tlawhtu hmasa ber a ni.

Kumin kumtawp lam hian Israel Prime Minister Benjamin Netanyahu pawh India ramah a rawn zin beisei a ni.

Tel Aviv-a a cham chhungin Swaraj-i hian Israel President Reuven Rivlin, Prime Minister Ben≠jamin Netanyahu bakah minister of Defence Moshe Ya'alon, Minister of National Infras≠tructure Yuval Steinitz leh legislator-te a hmu ang.

Israel rama India mi awmte pawh hun hmanpui a tum bawk. Palestine leh Israel a tlawh hnuah, Swaraj-i hian January 23-24 hian India-Arab League Foreign Minister meeting hmang turin Bahrain a pan leh ang.

Meeting chhung hian minister hian Arab League foreign minister 22-te chu hmuh vek a tum a ni.