SC-in Odd-Even scheme a thlawp

Delhi sorkarin khawpui boruak bawlhhlawh tihziaawmna tura motor, number kawpkim leh kawpkim lo a thlanchhawk tirna, Odd-Even scheme a siam chungchang leh, Delhi High Court-in January 15 thlenga he scheme kalpui a remtihna ngaihtuah ṭha tura Supreme Court-a ngenna thehluh chu Court-in a hnawl.

Supreme Court chuan Odd-Even scheme chungchanga ngenna thehluh chu ngaihtuah a tum loh thu sawiin, he thil hi inthehlar tumna hmanrua mai a ni, a ti.

Court chuan, "Boruak bawlhhlawh avangin mipuite'n an thih phah a, car pawh a remchan dan angin kan inhman ṭawm a ni," a ti.

Sorkar chuan boruak bawhhlawh zel tur veng tumin hma a la a, mitinin an thawhpui zawk tur a ni, a ti.

Odd-Even scheme hi ruahman lawk angin January 15 thleng hi hman a ni dawn. A tawp hnuah pawh sorkar chuan a hlawhtlin dante thlirin, a la hman nawn leh ngei rin a nih thu minister pakhat chuan a sawi.

Chief Minister Arvind Kejriwal-a chuan an scheme kalpui chu pawhsei a nih hrih dawn lo tih a sawi a, sorkar chuan odd-even scheme hmanga khawpui chhung boruak bawhhlawh a ziaawm phah dante chu ngun takin an zirchiang dawn a ni, a ti.

Delhi khawpui chhung boruak hi a bawlhhlawh tawh hle a, World Health Organization-in mihring tana him chin a tih aiin a let 10 chuang zetin a bawlhhlawh tawh a ni.

Odd-Even scheme hman hi vawiin hian a tawp tawh dawn a, Delhi-a Aam Aadmi Party sorkar chuan karleh khian thlir kirin, boruak bawlhhlawh tihziawmna turin hmalak chhunzawm zel a ngai dawn em tihte a ngaihtuah ang.

Meeting hi Chief Minister kaihhruaina hnuaiah Thawhṭanni hian neih tum a ni.

Transport Minister Gopal Rai chuan AAP sorkar scheme siam hlawhtling taka kalpui a nih leh, Delhi mipuiin an thlawp ṭhat avangin sorkar chuan January 17 hian Chhatrasal stadium-ah lawmthu sawina, 'Thanksgiving event' a buatsaih dawn tih a sawi. He hunah hian Delhi cabinet, sorkar department hrang hranga volunteer, Delhi Police, Civil Defence volunteer, NSS, DMRC leh DTC aiawhte pawh an tel dawn a ni.

Minister chuan state sorkarin boruak bawlhhlawh zel tur venna kawng khat atan khawpui chhunga thirsakawr hman chawi lar a tum dawn tih a sawi a, hei hi meeting neih turah pawh an sawiho ang. Hemi atana ruahmanna siam tur hian committee din a ni dawn a ni.

Rai chuan odd-even scheme hman chhunga dan bawhchhiate sum chawi aṭanga tlingkhawm, cheng vaibelchhe 1.5 chu man tlawm zawka thirsakawr hralhchhuah a nih theihna atan hman a nih tur thu a sawi bawk.