Maulana Masood Azhar man a ni lo: JeM

Pakistan media-te'n Pathankot airbase beihna kaihhnawhah Jaish-e-Mohammad (JeM) pawl hotu, Maulana Masood Azhar man a nih thu an report chu chhangin, JeM chuan an hotu hi man a ni lo tih a sawi.

Pakistan-a Punjab Law Minister, Rana Sanaullah pawhin Azhar chungchang hi sawichhuakin, man ni loin, protective custody-a dah a ni, a ti.

JeM chuan an pawl Facebook page-ah, "Khawvel hmun hrang hrangah kan hotu man nia an sawi chu an lo lawm a, mahse englai mahin man a ni lo," a ti.

Media-te chuan tunkar tir khan Azhar hi man niin an sawi a, mahse sorkar lamin thawm engmah an nei lo a, Punjab minister-in venhimna hnuaia dah a nih thu a sawi hi a chung≠changa official-te ṭawng≠chhuahna hmasa ber a ni.

Pakistan foreign ministry chuan hren a nih chungchangah information engmah an dawng lo niin a sawi.

Sanaullah chuan, "Maulana Azhar leh a ṭhiante chu Pathankot thilthleng kaihhawihah protective custody-a dah an ni. He pawikhawihnaah hian a inhnamhnawih a ni tih finfiah anih chuan kan man nghal ang," a ti.

January 2-a firfiakte'n Pathankot airbase an beihnaah khan India chuan Azhar hi a ruahmantu leh bultumtu berah a puh.

Airbase beitu firfiakte phone aṭanga an biak, Pakistan phone number pawh a finfiahna atan Pakistan sorkar hnenah hian a lo hrilh tawh bawk.

Firfiakte hian tihdan tur kawhhmuhtu nia an sawi, JeM hotu chhungte pawh an bia niin sorkar chuan a tarlang.

Pakistan Prime Minister Nawaz Sharif-a office chuan thuchhuah siamin, JeM mi leh sa eng emaw zat chu thu zawhfiah tura koh an nih thu leh, an office ṭhenkhat pawh kharsak an nih thu a sawi.

Pathankot airbase beih a nih avang hian India leh Pakistan-in nimina Islamabad-a secretary level inbiakna neih a lo tum pawh ṭhulh rih a ni.

External Affairs Ministry thupangtu, Vikas Swarup chuan Foreign Secretary S Jaishankar-a'n Pakistan foreign secretary biain, inbiakna neih hun sawn hi an remti dun a ni, a ti a, mahse a neih leh hun tur erawh an la sawilang lo.