Canada-a India palai haw turin hriattir; India-in a chhang let

Canada prime minister Justin Trudeau chuan June thlaa an rama Khalistan firfiak, Hardeep Singh Nijjar thah a nih chungchangah India chuan inrawlhna a nei nia puhin, Thawhlehni khan an rama India palai pakhat chu haw turin hriattirna a pe.

Trudeau hian parliamentary opposition emergency session-ah thu sawiin, an ram chhunga Khalistan firfiak thah a nih danah India a inrawlh ngeia a hriat thu hi sawiin, Ottawa-a awm mek, India palai pakhat chu rinhlelh thilah Canada chhuahsan tur hian a hriattir thu a sawi a ni. Trudeau chuan,"Canada khua leh tui, Canada ram chhung ngeia thah a nihna kawnga ram dang sorkar a inrawlh a nih chuan kan ram thuneihna an hnuaichhiah a ni," tiin a sawi. Hemi chungchangah hian foreign minister Melanie Jolie chuan Trudeau-a sorkar chuan rang takin a hma la tih sawiin India foreign intelligence agency, Research and Analysis Wing (RAW) tana thawk a nih thu a sawi a, a hming erawh tarlan a ni lo thung.

India erawh chuan Canada PM puhna hi a pha a, thil awihawm loh leh tum dang nei niin a sawi thung. Canada thil tih dan chhan let nan hian India chuan ram chhung inrelbawlnaa inrawlhah leh, India do zawnga cheah puhin India-a Canada palai chu haw turin hriattirna a pe ve nghal a, ni nga ral hma ngeia India chhuahsan turin a ti.

Ministry of External Affairs (MEA) thuchhuahin a tarlan danin, Canada PM-in India a puhna chu Canada-a Khalistan awmte chet dan aṭanga mipui rilru lak pen tumna a ni tiin,"Heng inpuhna hi Canada-in himna a pek Khalistan-te thlawpna leh India thuneihna ngaihnepna a ni. Canada sorkarin hmalakna a nei lo hi a ngaihṭhatthlak loh hle a ni," tiin, Canada PM Justin Trudeau leh PM Narendra Modi pawhin hemi chungchangah hian inbiakna an nei tawh niin an sawi.

Nijjar hi India-in firfiak man a duh zinga tel a ni a, National Investigation Agency (NIA) chuan nikum July khan Nijjar-a lu manah hian Rs. nuai 10 an lo dah tawh a ni. India ram chhungah firfiaka chetna hrang hrang a kalpui ṭhin nia hriat a ni a, Khalistan Tiger Force (KTF)-a phusa ber a ni.