Kurmi-te'n an thil phut nawr nan rel kawng an dang

Jharkhand-a Kurmi hnamte chuan tiam chin awm loa nawrh huaihawt tumin, vawiin aṭangin rel kawng an dang a, hei vang hian rel pakua chu cancel niin rel pariat chu kawng dangah tlantir a ni.

Kurmi te hian tribal status neih an phut bakah, an hnam ṭawng, Kurmali chu constitution-a eighth schedule hnuaia dah an phut bawk.

Jharkhand-a Kurmi intel khawm lian ber, Totemik Kurmi Vikas Morcha (TKVM) president, Sheetal Ohdar chuan West Bengal-a Adivasi Kurmi Samaj leh Odisha-a Kurmi Sena-te pawhin an thil nawr chu an pui dawn niin a tarlang. Ohdar chuan Kurmi hnam zinga mi tam tak chu an hnam thuam nen nawrhnaah hian an kal tur thu sawi bawkin, khuang bakah rimawi tumna hmanraw dang nen, Chhau, Pata, Natuwa leh Jhumar lamte an lantir dawn bawk niin a sawi.

Adivasi Kurmi Samaj (AKS) thupuangtu, Harmohan Mahto chuan Kurmi-te chu kum 1913-a British rorelna hnuaiah khan aboriginal tribal zinga dah an ni, a ti."Sorkar laipuiin September 6, 1950-a Scheduled Tribe (ST) a tihchhuah khan West Bengal, Bihar leh Odisha-ahte Other Backward Castes (OBC)-ah dah an ni. Hman aṭang tawh khan Kurmis te hi tribal an ni," tiin, state hrang hranga Kurmi-te chu vaibelchhe thum an tling niin a sawi. Kurmis te hian an thil phut nawrna atan hian nikum September thla khan ni nga chhung rel kawng hi an lo dang tawh bawk.