PM Modi-a'n Parliament building hlui hming tur a puang

Parliament special session neih mek chu nimin khan building hlui aṭangin building tharah an insawn.

Prime minister Narendra Modi chuan MP zawng zawngte chu building hlui aṭang hian building tharah kein a kalpui a ni. Building hluia a thusawi hnuhnung berah Modi chuan parliament building hlui chuan 'Samvidhan Sadan' (Constitution House) hming a pu tawh ang tiin a puang.

"Vawiinah he hmun aṭang hian kan chhuak anga parliament building tharah kan lut tawh dawn a ni. Vawiin hi Ganesh Chaturthi a nih bawk avangin a hlu dangdai hle," tiin, a bula house pahnih speaker ṭhute hnenah ngenna a siam a,"Hei hi ka ngen duh che u a, uluk taka min ngaihtuahsak pawh ka beisei. Building thara kan kal dawn tak avang hian he building hlutna leh ropuina hi tlahniam lo se ka duh. Parliament building hlui zawk kan ti mai tur a ni lo. In phal chuan he building hian 'Samvidhan Sadan' tih hming pu se la, kan zavai atan kan chakna hnar lo ni rawh se. Samvidhan Sadan kan tih hian he lai hmuna mi ropui tak tak lo ṭhu tawh leh ro lo rel tawhte sulhnu kha kan hre reng thei ang a, ṭhangthar lo awm zel turte tan inzirna ṭha tak kan hnutchhiah a ni ang," tiin a sawi.

Sorkar laipui chuan parliament building hlui hi tihchhiat a tum lo niin an sawi a, parliament thiltih eng eng emaw dawl thei tura chei ṭhat an tum zawk dawn niin an sawi. Parliament building hlui hi British architect Sir Edwin Lutyens leh Herbert Baker-te design a ni a, kum 1927 khan sak zawh niin, kum 96-a upa a ni.