Sorkarin kan thil phut a remtih chuan GST hi a fel nghal ang: Rahul

Congress vice president Rahul Gandhi chuan sorkar lapuiin Parliament-a pass tuma a beih mek, chhiah lakna dan thar Goods and Services Tax Bill chungchangah, an party-in an duhdan an tarlante chu a pawmpui a nih chuan Parliament-ah minute 15 chhungin pass fel nghal a ni ang, a ti.

GST Bill thar hi Lok Sabha-ah a tlang hnuah, BJP kaihhruai NDA sorkar hian Rajya Sabha-ah majority a neih loh avangin Congress puihna lo chuan a tlang thei lo a ni.

Rahul Gandhi chuan, "Chhiah lak dan chungchangah bithliah chin awmlohna GST Bill siam hi kan duh lo. Mipuite hnenah chhiah eng chin nge a lak theih tih hriat kan duh a ni," a ti. Hei bakah hian Congress party hian BJP sorkarin GST Bill-a state leh state inkara bungraw phurhah chhiah 1% lakbelh a tumna chu a duh lo a, hei hi sut turin a phut bawk. An duhdante chu sorkar≠in a pawm chuan Rajya Sabha-ah an party chuan an lo thawp nghal dawn tih a sawi.

Rahul chuan Congress kaihhruai UPA sorkarin pawhin GST Bill hi pass tumin an lo bei ṭhin a, mahse BJP chuan a dang zel a ni, a ti.

"Fiance Minister Arun Jaitley chuan kum sarih chhung pass a remti tawh lo a, tuna Prime Minister ngei pawh hi chief minister a nih lai niin, a remti lo bawk a ni.

BJP chuan pass a nih theihna tur zawng zawng an lo dang a ni. Mahse Congress chuan Parliament-a lo dan hi a tum ber a ni lo," a ti.

GST chungchanga an inhriatthiam lohna awmte chu sawifel theih reng a nih thu sawiin, Congress hruaitu chuan "Sorkar laipui hian inbiakna neih hi a ngai thutak ve lo a ni. Sawiho turin kan inhawng reng a, mahse sorkar chuan chu chu a hmang ṭangkai duh lo a ni," a ti. GST hi a taka hman a nih theihna tura hma lak ṭan thuai a pawimawh thu a sawi bawk.

Sorkar laipui chuan GST bill chung≠changah hian inremna siam dan kawng a zawn mek thu leh, February thla tawpa Parliament session neih leh hunah pass hman ngei a tum thu a sawi.