Loneitute policy ennawn dawn

Sorkar laipui chuan Supreme Court hnenah loneitute puala policy duan, National Policy for Farmers (NPF), 2007 chu kum riat hman a ni tawh a, tun hnaiah harsatna tawk loneitu intihlum an pun zel avangin he policy ennawn tur hian mithiam bikte awmna committee din a ni dawn tih a hrilh.

Ministry of Agriculture chuan expert committee dinna tur hian rawtna pawh a thlen tawh thu a sawi.

"Policy hman mek hi kum riat zet hman a ni tawh a, hei vang hian ennawn a ngai tawh a ni. Sorkar chuan rang taka hma lain, thil awmdan enfiah tur hian mithiam bik leh stakeholder te awmna committee a din dawn a ni," a ti.

Ministry-a Under Secretary Kamal Arora chuan NPF, 2007 a hmalakna tur duante chu state leh sorkar laipui chuan scheme hrang hrang hmangin an kalpui deuh vek tawh a ni tih a sawi.