Sorkarin kumtin anganwadi nuai khat sak a tum

Sorkar laipui chuan kum li chhungin kumtin ramchhung hmun hrang hrangah Anganwadi center nuai khat sak a tum.

Ramchhunga anganwandi awm zinga 70% chu mi in luah hawh vek a ni a, hei vang hian sorkar laipui chuan mahnia building hran neih tir a tum a, kum 2019-ah chuan angawandi centre nuai li-te chu mi in luahah ni loin, mahni building ngeiah an awm thei dawn a ni.

Women and Child Development Ministry chuan Anganwadi Centres (AWC) sakna tura inkaihruaina dana, centre pakhat sakna atana cheng nuai khat zel pek tura tih pawh siamṭha turin Rural Development department a ngen.

Sorkarin rawtna a siam hmasakah chuan kum li chhung hian state 11-a hmun hnufual bik 2,534-ah kum tin AWC hi 50,000 sak tura tih a ni. Mahse hmun dangah pawh anganwadi bulding indaih≠lohna a nasa a, hei vang hian a tipung leh ta a ni.

Centre sakna tur sum hi Mahatma Gandhi National Rural Employment Guarantee Act (MGNREGA) leh Integrated Child Development Scheme (ICDS) budget aṭangin pek a ni ang.

Rural Developent De≠partment chuan MGNREGA scheme hnuaiah cheng nuai 5 a pe ang a, a bak chu WCD in ICDS programme aṭangin a tum ve thung ang.

AWC sakna tur project hi WCD, Rural Development leh Panchayati Raj Ministry-te'n an thawk dawn a, tui, inthiarna leh in sakna tur ramte an ngaihtuah ang.

Centre chu naupangte tana hmun him a ni tur a ni a, sitting room, choka, leh inthiarna te a awm tur a ni a, infiamna hmun tur feet 600 biala zau hmun awl a awm bawk tur a ni.