Kejriwal-a pentuia thehtu bail-in chhuah Delhi Police hian CM hi an tihhlumtir thei ang: Sisodia
Delhi Chief Minister Arvind Kejriwal-a'n Pathianni-a Chhatrasal Stadium-a public meeting a neih laia pentuia thehtu chu a zan khan bail-a chhuahtir a ni a, nimin kha Rohini court-ah inlan tura koh a ni.
Pentuia CM thehttu, Bhavna Arora chuan Delhi-a Aam Aadmi Party (AAP) sorkar chu CNG scam-a inhnamhnawihah a puh. Bike number-ah CNG sticker pek chhuah a nih thu a sawi.
Chhatrasal Stadium-a public meeting hi Delhi sorkarin khawpui boruak bawlhhlawh tihziaawmna tur kawng khat atana motor number kawpkim leh kawpkim lo a tlanchhawk tirna, Odd-Even scheme hlawhtling taka kalpui a nih avanga mipuite hnena lawmthu sawina atana buatsaih a ni.
CM beitu chuan, "Odd-Even scheme chu thil ṭha tak a ni a, mahse a phenah hian CNG buaina hi a awm a, a finfiahna pawh ka nei a ni. Hei vang hian CM leh Transport Minister Gopal Raiji pawh hmuh ka duh a, mahse min hmu duh lo a ni," a ti.
Hmeichhia hian court-ah hian inlanin, CNG scam chungchanga AAP sorkar a puhna finfiahna lehkhate a thehlut dawn a, an chhui zui ngei a beisei thu a sawi.
Pentuia CM a theh hnua a laka party worker-te chetdan chu a sawisel a, hemi rual hian hmun hima an hruai vangin Delhi Police-te chu lawmthu a hrilh nghal bawk.
Delhi Deputy Chief Minister Manish Sisodia chuan Pathianni-a CM beih a nih dan chu BJP-te ruahmanna vek niin a sawi.
Sisodia chuan BJP hian Delhi Polie-te puihnain he inbeihna hi an ruahman a ni, a ti.
Nimina chanchin thar lakhawmtute a kawmnaah, Deputy CM chuan, "Thil thleng zawng zawng kha BJP-in Delhi Police-te puihnaa an tih a ni. Delhi Police-te hian CM hi an la tihhlumtir thei hial ang" tiin a sawi.
CM-in beih a tawh lai khan Delhi Police-te chu a venghimtu aiin a thlirtu ang maia an awm zawk thu sawiin, Sisodia chuan sawiin, "Public meeting-ah hian Delhi cabinet pum an awm chungin, Delhi Police-te'n venhimna an pe ṭha tawk lo a ni. Mipuite chu enfiah loin an luhtir mai a, he hmeichhiain CM beih tuma stage lam a pan lai pawh khan police hmeichhia pakhat hmuh tur pawh an awm lo," a ti.
Chhatrasal Stadium-a thil thleng chuan Delhi Police-te'n CM himna an ngaih pawimawh tawk loh zia a lan chiantir hle a ni tiin Sisodia chuan a sawi.
Delhi sorkarin Odd-Even scheme a kalpui hi a hlawhtling thawkhat hle a, motor neitute pawn an zawm ṭha hle nia sawi a ni.
He scheme hman chhung hian Delhi khawpui boruak bawlhhlawh lam pawh a ziaawm phah nia sawi a ni bawk.
Sorkar chuan scheme hlawhtlin dante hi thlirin, hman a nih leh theih dan tur pawh ngaihtuah leh a tum.
CM Kejirwal-a'n politics a luhchilh hmaa Team Anna hnuaia a thawhpui ṭhin, social activist Anna Hazare chuan Kejriwal-a hi fakin, CM a nih hnuah kawng dik lo zawh a la nei lo a ni, a ti.
"Kejriwal hi thil ṭha duhtu a ni. Chief Minister a nihna anga a hnathawh chin hi a ṭha lam vek a ni. Mi rinawm leh langtlanga thil kalpui ṭhin a ni a, Deputy CM Manish Sisodia pawh thil ṭha duhtu bawk a ni. Kan ramah pawisa thiltihtheihnain a thunun theih loh politics hi hmuh ka duh a ni," a ti.
Delhi sorkarin odd-even scheme a siam chu fakin, khawpui lian dangte pawhin he scheme hi kalpui se a duh thu a sawi. Khawpui boruak bawlhhlawh tiziaawm tur leh traffic tawt lutuk tihrehna tura Delhi sorkar hmalakna chuan fak a phu hle a ti.