Lalu-a'n car siren tihrik khapna a thlawp

Bihar Chief Minister Nitish Kumar-a'n an state chhungah VIP light sen leh pawl chhi pha chinte siren tihrik a khap chu ṭangrual sorkar a siampui, Rashtriya Janata Dal (RJD) hotu Lalu Prasad chuan a thlawp thu a sawi.

Pathianni khan Lalu Prasad hi RJD president a term sarihna chelh turin lakluh a ni a, hemi puala party inkhawm buatsaihah he thu hi sawichhuakin, "Nitish Kumar hian thil dik tak a ti a ni," a ti.

Lalu Prasad chuan, "VIP light hmangte hian dik lo takin siren an tiri fo a, mahse CM thupek siam avang hian hman diklohna thleng ṭhin pawh a reh phah dawn a ni," a ti. Hetihlai hian eptu pawl, BJP leh party ṭhenkhat chuan CM thupek hi an sawisel a, red or blue beacon car hmang pha chinte thuneihna laksakah an puh.

Prasad chuan Nitish Kumar-a kaihhruai, JDU-RJD-Congress ṭang≠rual, Grand Alliance-te'n sorkarna an siam chu kum 20 dang pawh a la ding chhunzawm thei dawn niin a sawi bawk.

CM Nitish Kumar hian December thla tawp lamah hian an state chhunga noise pollution tihziaawmna tur kawng khat atan VIP light chhi pa chinte'n siren an tihrik ṭhin chu a khap a, governor, Chief Justice phurtu motor bakah kangṭhelh motor leh ambulance-te chauhin siren an tihrik hi phalsak an ni.

Hei bakah hian a nazawnga motor khalhtute'n horn an hmet ri ṭhin pawh titawp turin a ti bawk.

Lalu Prasad chuan a hmaa a lo sawi tawh, Varanasi Yatra chu neih thuai a tum thu a sawi a, hemi chhung hian mipuite hnenah Narendra Modi a prime minister hnua thil an hmuh dante a zawt kual dawn tih a sawi.