Hyderabad University zirlai intihhlum chhanah minister puh

Hyderabad Central University zirlai, Rohith Vermula chu December 21-a hostel aṭanga hnawhchhuah a nih avangin Pathianni khan a intihlum a, he thil thleng duh lohna lantirin zirlaiten nawrh an huaihawt.

Nawrh huaihawt zinga zirlai pariat chu police-te'n an man.

Nimin khan zirlai rualte chu union minister Bandaru Dattatreya chenna in kawtah an pungkhawm a, zirlai intihhlumna chhanah minister hi inrawlha puhin, ban an phut.

Research scholar, kum 26 mi Rohith hi Pathianni khan hostel-a a ṭhianpa room-ah a inawkhlum a, a lehkha hnutchhiahah chuan a intihlumna chhanah mawhphurtu tumah an awm loh thu a sawi.

Rohith leh research scholar dang pali-te hi December 21 khan hostel aṭanga hnawhchhuah niin, mess room leh hmun dangah pawh kal khap an ni. He thil thleng vang hian Rohith hi a rilru a na a, a intihlum phah nia sawi a ni.

Union minister Bandaru Dattatreya chu Rohith leh zirlai dang pali-te hrem tura nikum August thlaa univeristy thuneitute hrilhah puh a ni a, hei vang hian a lakah thubuai pawh ziahluh a ni tawh bawk.

Hrem tawk zirlai panga-te hi an vaiin Ambedkar union member an ni a, nikum August thlaa 1993-a Bombay-a bomb tipuaktua puh, Yakum Memon tihhlum a nih chungchanga lungawi lohna lantirnaah khan BJP student wing, Akhil Bharatiya Vidyarthi Parishad (ABVP) activist-te beiah puh an ni.

University chuan he buaina thleng chungchang hi a chhui hnuah thiam a chantir vek a, mahse December thla khan a thutlukna siam tawh chu tihdanglamin, zirlai panga-te hi a hrem leh a ni.

Zirlaite chuan Rohith leh midang pali-te hrem an nih leh chhanah hian union minister Dattatreya hi an puh a, Human Resource Development (HRD) Minister Smirti Irani hnenah lehkha thawnin, university chu firfiak leh ram politics dodaltute awmkhawmnaah a chang a ni, tia a hrilh thu an tarlang.

Dattatreya hian university thuneitute pawh ABVP activist beitute an hrem loh avangin a sawisel bawk.

Rohith-a intihhlum chungchangah minister bakah Vice Chancellor Appa Rao pawh mawhphurtuah puh a ni bawk.

Delhi Chief Minister Arvind Kejriwal-a chuan nimin khan Hyderabad-a Dalit zirlai intihhlum chungchangah Prime Minister Narendra Modi chu beiin, he thila mawhphurtua puh union minister chu ban tur leh, ram mipuite hmaa ngaihdam dil turin a phut. Kejriwal-a chuan, "He thil hi mahni intihlum ni loin, tualthahna a ni. Democracy leh intluktlanna tihhlumna a ni," a ti.

Congress party pawhin Dattatreya chu minister a nihna aṭanga ban nghal tura an phut thu an sawi. Congress party thupuangtu RPN Singh chuan, "Minister lakah FIR thehluh a nih avangin ban nghal a ni tur a ni. Vice chancellor leh midang inhnamhnawiha puhte pawh an hna aṭang hian chawlhtir an ni tur a ni," a ti.

Party vice president Rahul Gandhi chuan nimin khan zirlai lungawi lote hmu tur hian Hyderabad a pan.

Sorkar laipui chuan Rohith intihhlum chungchang chhui tur hian member pahnih awmna a din a, ni hnih chhunga report thehlut turin a ti.